Go tiela thutong. Paulo o a laela
1Ke go laela wa go go eniša re le pele ga Modimo le pele ga Morena Jesu Kriste, e a tlogo sekiša ba ba phelago le ba ba hwilego, re tseba ponagalo ya gagwe le mmušo wa gagwe, 2ke re: Baa segoeledi sa lentšu, o le emele ka lebaka la gona le ka le le sego la gona, o kgothatše, o eletše, o kgaleme o sa fele pelo o ruta. 3Gobane go tlo tla lebaka le ba ka se kego ba kgona go theetša thuto ye e phedilego; ba tlo ikgobela baruti ka go ya le dikganyogo tša bona, ka go rata go kwiša ditsebe bose. 4Gobane ditsebe tša bona di tlo hlala therešo; ba tlo boela dinonwaneng. 5Ge e le wena, phafogela tšohle; kgotlelela mabothata, o dire modiro wa segoeledi, o be mohlanka ka botlalo.
6Ge e la nna, ke šetše ke dirwa sedimo; lebaka la ka la go tloga le kgauswi. 7Ke hlabane tlhabano e botse; ke feditše go šiana; tumelo ke e swere. 8Mphapahlogo wa go re ke lokile o šetše o beilwe pele ga ka; ke wo ke tlo go o newa ke Morena Moahlodi wa go loka ka letšatši leo; e se nna fela; o tlo o nea bohle ba ba ratilego ge a bonagala.
9Phegelela go tla go nna ka pela. 10Dema o ntlogetše ka go rata lefase le la bjale; o ile Thesalonika. Keresentsi o ile Galatia. Tito o ile Dalamatia. 11E a nago le nna ke Luka a nnoši. Bitša Mareka, o tle nae. Ke yena a tlogo nkgahla ge a ntirela. 12Tigiko yena ke mo rometše kua Efeso. 13O ko ntlele le kobo ye ke e tlogetšego Teroa ga Karepo, le dipuku tšela, gagolo matlakala ala a go ngwala.
14Alesandere monna yola wa morudi, o ntirile mo gobe ka kudukudu. Morena o tlo mmušetša ka mo go swanetšego mediro ya gagwe. 15Le wena o mo phafogele, gobane thuto ya rena o e ganeditše gagolo.
16Mola ke sekišwa la pele, go hlokegile wa go tla a ema le nna; ka moka ba ntlogetše. A ba se ke ba balelwa molato woo. 17E a emego le nna ke yena Morena, a mpha maatla, gore botseta bja ka bo phethege, mme bantle bohle ba kwe; gomme ke hlakodišitšwe molomong wa tau. 18Gomme yena Morena o sa tlo ntlhakodiša medirong e mebe yohle ka tlo phologela mmušong wa gagwe wa magodimong. Go retwa a e be ga gagwe go iša mehleng ya neng le neng. Amene.
19Dumediša Perisika le Akwila le ba lapeng la boOnesiforo. 20Erasito o šetše Korinthe: Torofimo ke mo tlogetše Mileto a babja. 21Se diege, o tle e sešo ya ba marega.
Oibulo o a go dumediša, le Pudentsi, le Lino, le Kelaudia, le bana ba borena ka moka.
22A Morena Jesu Kriste a be le moya wa gago.
Kgaugelo a e le tlele. Amene.
