2 BATHESALONIKA 3

₁Bana bešo! Ke sa re: Re rapeleleng gore Lentšu la Morena le tšwelele pele, le tumišege bjalo ka moo ga geno, ₂Le gore re hlakodišwe bathong ba babe ba go se tsebalege; gobane tumelo ga se ya bohle.

₃Morena yena ke mmotegi; o tlo le tiiša a le phemela tše mpe. ₄Gomme rena re le holofetše ka Morena, gore tše re le laelago tšona le a di dira, mme le tlo fela le di dira.

₅A Morena a etetše dipelo tša lena a di iše leratong la Modimo le kgotlelelong ya Kriste.

₆Gomme re laela lena bana bešo, ka ina la Mong wa rena Jesu Kriste gore le ikaroganye le ngwaneno e mongwe le e mongwe e a arogago a se ye ka molao le ka taelo ye a e filwego ke rena. ₇Lena beng le a tseba ka mo le swanetšego go etša rena ka gona, gobane ga ra ka ra šaetša re na le lena. ₈Le go ja ga ra ka, ra ja bogobe bja go fo fiwa; sa rena e be e le go dira le go itapiša gore re se ke ra imetša motho wa lena. ₉E se gore go babalelwa ga go a re swanela; e be e le gore le bone rena le tle le re etše. ₁₀Le gona mola re na le lena re le laetše ra re: Moganamodiro, le go ja a lese.

₁₁Ge re realo ke ka gore re kwele ge ba re: Ba bangwe ba lena ba tšea ka tsela ya go aroga, ga ba sware modiro, ba dira tše di išago bošaeding. ₁₂Badiratšeo re a ba laela, re bile re ba kgopela ka Mong wa rena Jesu Kriste, gore ba sware modiro ba ikhomoletše, ba je bogobe e lego bja bona.

₁₃Gomme lena bana bešo, le se ke la lapa go dira tše bolo. ₁₄Ge go ka ba le e a sa ratego go kwa se lengwalo le le se bolelago, le lese go kopana nae, gore a hlabje ke dihlong. ₁₅E se be go mo dira lenaba; e be go mo sola, ka gore ke ngwana bolena.

₁₆Gomme yena Morena wa khutšo a a fele a le fa khutšo e lekanelago gohle.

₁₇Tumedišo ya ka še, ye ke e ngwalago ka seatla sa ka, nna Paulo; ke lona leswao la ka mangwalong ka moka. Ke ngwala ka mokgwa woo.

₁₈Kgaugelo ya Mong wa rena Jesu Kriste a e be le lena ka moka. Amene.