2 BATHESALONIKA 2

₁Bana bešo! Re na le se re le kgopelago sona ka baka la go tla ga Mong wa rena Jesu Kriste, le go tlo bothelwa ga rena go yena. ₂Re re: Le se ke la fo šišinywa ka pela la tlogelana le tlhaologanyo la gakantšhwa ka tša moya, le ka thuto, le ka lengwalo le ba rego le tšwa go rena, gwa tla gwa thwe: Letšatši la Kriste le kgauswi! ₃Le se ke la gakišwa ke motho le ka mokgwa ofe, gobane letšatši leo le ka se ke la tla go sešo gwa tla tlhanogo pele, ge go sešo gwa tšwelela yena motho wa bobe, morwa wa tshenyego. ₄Yena lenaba, e a nyatšago tšohle tše ba kago re ke Modimo le thapelo; a tlo ba a dula Ntlongkgethwa ya Modimo, a ipolela a re: Modimo ke nna!

₅A ga le sa gopola, ge ke le boditše dilo tše mohla wola ke na le lena? ₆Mme bjale le a tseba, se se mo diegišago se gona, sa gore a tle a utologe e le lebaka la gagwe. ₇Ge e le sefsiswi sa bokgopo se šetše se tsoša maatla; fela, modiegiši o sa tlo thoma go tšwa tseleng. ₈Ke mo go tlogo bonagatšwa motho wa bobe yo Morena a tlogo mo fediša ka mohemo wa molomo wa gagwe, a mo timetša ka go bonagala ga go tla ga gagwe. ₉O tlo timetša yena eo wa go tla ka maatla a Sathane, ka maatlamoka a maaka, le ka matete a maaka, le ka mehlolo ya maaka. ₁₀Ke yena wa go tla ka phapošo e tletšego ya dibe, a fapoša balahlegi ka ge ba ganne go rata therešo ya go ba phološa. ₁₁Molato ke wona woo ge Modimo a ba lesitše ba tšewa ke maatla a phoro, a ba lesa ba yo dumela maaka, ₁₂gore go lahlwe bohle ba sa kago ba dumela therešo, ba e lego ba go kgahlwa ke sebe.

₁₃Ge e le rena, se se re swanetšego ke go le lebogela go Modimo ka mehla, lena bana bešo, baratwa ba Morena; gobane Modimo o le hlaoletše go phološwa go tloga mathomong, gore le be bakgethwa ka Moya, le dumele therešo. ₁₄O le bileditše sona ka Ebangedi ya rena, gore le fihlele letago la Mong wa rena Jesu Kriste. ₁₅Ke gona hle, bana bešo! Emang, le tiiše go ya ka taelo tše le di rutilwego ka polelo ya rena le ka lengwalo la rena.

₁₆Gomme yena Mong wa rena Jesu Kriste, le Modimo Tata wešo e a re ratilwego, e a re filego khomotšo ya neng le neng, a re fa kholofelo e botse ka kgaugelo, ₁₇a a homotše dipelo tša lena, a le kgoniše go dira tše botse le go bolela tše botse fela.