Polokelo ya Kgwerano e tlišwa Jerusalema
1Gomme Dafida a buša a botha Baisiraele ba masogana, ba dikete tše masome a mararo. 2Dafida a tsoga, a tšwa le batho ka moka ba ba bego ba na nae, ba ya Baala-Juda, gore ba yo tšea polokelo ya Modimo ye go bitšwago leina go yona, leina la Morena wa mašaba, ye a dulago go yona mo gare ga Bakerubi. 3Polokelo ya Modimo ba e fakela koloing e mpsha ba e ntšhitše mo ngwakong wa Abinadaba o lego mmotong. Gomme Usa le Ahio barwa ba Abinadaba ba sepediša koloi e mpsha yeo. 4Ya re ge ba e rwele ka mokgwa woo, ba tloga mo ngwakong wa Abinadaba o lego mmotong, Ahio a eta polokelo pele. 5Dafida le ba setšhaba sa Isiraele ka moka ba tšama ba bina ka maatla pele ga Morena, ba letša diletšo tša mehutahuta, tša metato, le makope, le meropa, le diphala, le dinaka.
6Ya re ge ba tla ka seboeng sa Nakone, Usa a ntšha letsogo a šegeletša polokelo ya Modimo, a swarelela ka yona, ka gobane dikgomo di be di thedimoga. 7Ke mo bogale bja Morena bo tuketšego Usa; Modimo a mo otla gona fa ka baka la bošaedi bjoo, a hwela gona moo hleng ga polokelo. 8Dafida a tšhoga ge Morena a ubutše Usa; leina la felo fao ya ba Pheretse-Usa, le nankhono.
9Mohla woo Dafida a boifa Morena, a re: Polokelo ya Morena e ka tla bjang go nna? 10A se rate ge polokelo ya Morena e ka išwa motseng wa Dafida, a e iša ngwakong wa Obede-Edomo wa Gathe. 11Gwa fela dikgwedi tše tharo, polokelo ya Morena e dutše moo ngwakong wa Obede-Edomo wa Gathe; gomme Morena a šegofatša Obede-Edomo le bohle ba lapeng la gagwe.
12Ba botša kgoši Dafida ba re: Morena o šegofaditše ba lapeng la Obede-Edomo, le tšohle tše a nago natšo ka baka la polokelo ya Modimo. Ka gona Dafida a ya a tšea polokelo ya Modimo, a e ntšha ngwakong wa Obede-Edomo, a e iša motseng wa Dafida ka go thaba. 13A re ge barwadi ba polokelo ya Morena ba gatile dikgato tše di selelago, gwa hlabja powana le namane e nonnego, ya ba sedimo. 14Gomme Dafida a tšama a bina ka maatla a gagwe ka moka pele ga Morena, a apere kobo ya leokodi. 15Gomme Dafida le ba setšhaba sa Isiraele ka moka ba rotoga ba na le polokelo ya Morena ka tlhalalo le ka mollo wa dinaka.
16Ya re ge polokelo ya Morena e tsena motseng wa Dafida, Mikala morwedi wa Saulo a ukamela ka lešoba, a bona kgoši Dafida a tšama a sela a bina pele ga Morena; a mo nyatša pelong ya gagwe. 17Polokelo ya Morena ya tlišwa ya bewa felo ga yona mo ngwakong wo Dafida a bego a e agetše wona. Dafida a tlišetša Morena dihlabelo le dileboga. 18A re ge a feditše go tliša dihlabelo le dileboga, a šegofatša setšhaba leineng la Morena wa mašaba. 19Gomme a abela setšhaba ka moka, bontši ka moka bja Isiraele, banna le basadi, ka o tee ka o tee, ba abelwa senkgwa, le lefišwana la beine, le senkgwana sa makwapi a morara. Batho ba tsebo ikela ba boela magaeng.
20Dafida ge a boela gae go dumediša ba motse ga gagwe, a gahlanetšwa ke Mikala morwedi wa Saulo. Yena eo a re: Lehono kgoši ya Isiraele e be e thathankga e hlobotše e bonwa ke balata ba yona ba basetsana le ba masogana, e hlobotše wa dikobaobane.
21Dafida a fetola a re: Ke tlo fela ke binela Morena e a nkgethilego bakeng sa tatago le bakeng sa leloko la geno ka moka, a ntira moetapele wa setšhaba sa Morena, sa Isiraele. 22Ke sa tlo ikokobetša go fetiša fa ke itshema e monyane. Ge e le basetsana bao o ba boletšego, bona ke tlo godišwa le bona, ra godišwa bohle.
23Gomme yena Mikala morwedi wa Saulo e be e le moopa, a ba a hwa a se ne ngwana.
