Batseta ba Dafida ge ba gobošwa ke Baamoni
1Ka morago ga ditaba tšeo gwa hwa kgoši ya Baamoni; Hanuni a buša legatong la tatagwe. 2Dafida a re: Hanuni morwa wa Nahasi ke tlo mo dira ka botho, bjalo ka tatagwe ge a ntirile ka botho. Dafida a roma batseta ba gagwe ba ya go emela Hanuni ka baka la tatagwe. Batseta bao ba tla nageng ya Baamoni.
3Gomme bakgoma ba Baamoni ba bolela le Hanuni mong wa bona ba re: A o re Dafida o godiša tatago ge a romile batseta ba tla go go emela? A ga o bone gobane Dafida o romile bahlanka ba gagwe gore ba tle ba lebeleše motse, e be go o hlola gore a tle a o hule?
4Ke moka Hanuni a swara batseta ba Dafida, a ba boola maledu a ka thoko e tee, a ripa diaparo tša bona ka bogare go tla ka dinokeng, a tsebo ba lesetša ba tloga.
5Dafida ge a botšwa taba ye, a roma motho a ba gahlanetša, gobane banna bao ba be ba gobošitšwe o šoro; gomme kgoši ya re: Dulang motseng wa Jeriko, maledu a lena a mele; le tsebo goroga.
6Ya re ge Baamoni ba bona gore ba rumotše Dafida, ba roma batseta ba thwala Basiria ba Bethe-Rehobo, le Basiria ba Tsoba, banna ba dikete tše masome a mabedi ba bahlabani, le banna ba sekete ba kgoši Maaka, le banna ba Tobo ba dikete tše lesome le metšo e mebedi. 7Dafida ge a di kwa, a roma Joaba le madira ka moka a banna ba bagale. 8Gomme Baamoni ba tšwa, ba laiwa mo pele ga kgoro ya motse. Basiria ba Tsoba le ba Rehobo le banna ba Tobo le ba Maaka, bona ba emela thoko nageng.
9Bjale Joaba ge a bona gobane madira a mo wela ka morago le ka pele, a hlaola masogana masoganeng ka moka a Isiraele, a ba hlopha a ba lebanya le Basiria. 10Ba ba šetšego a ba gafela Abisai monnagwe, a ba hlopha a ba lebanya le Baamoni. 11Gomme a re: Ge Basiria ba ka mpatla, o tle o ntlatše. Ge Baamoni ba ka go patla, nna ke tlo tla ka go tlatša. 12Tiiša maatla, gomme re tiišane maatla ka baka la setšhaba sa gešo, le ka baka la metse ya Modimo wa rena. Morena o tlo dira se se mo kgahlago.
13Gomme Joaba le batho ba ba bego ba na nae ba hlahlamologa ba hlabana le Basiria. Basiria ba tšhaba ba hlomarelwa. 14Bjale Baamoni ge ba bona Basiria ba tšhaba, le bona ba tšhaba Abisai ba boela motseng. Gomme Joaba a gomela Baamoni a boela Jerusalema.
15Gomme Basiria ge ba bona ba fentšwe ke Baisiraele, ba boela ba lakana. 16Hadada-Esere a roma batseta ba epa Basiria ba kua mošola wa noka, ba tla Helama ba etilwe pele ke Sobake molaodi wa madira a Hadada-Esere. 17Dafida ge a botšwa taba tše, a rapa Baisiraele ka moka, a sela noka ya Jorodane, a tla moo Helama, gomme Basiria ba hlahlamologa ba lebana le Dafida ba hlabana nae. 18Basiria ba fenywa ke Baisiraele; Dafida a bolaya makgolo a šupago a dipitsi tša dikoloi, le banamedi ba dipitsi ba dikete tše masome a mane; a bolaya le Sobake molaodi wa madira a Basiria, a hwela ntshe. 19Bjale dikgoši tše di bego di bušwa ke Hadada-Esere, ge di bona gobane di fentšwe, tša loba ya ba bahlanka ba Isiraele. Gomme Basiria ba boifa, ba se sa namolela Baamoni.
