2 DIKGOŠI 3

₁Jorama morwa wa Ahaba ge a eba kgoši ya Isiraele motseng wa Samaria, e be e le ka ngwaga wa lesome le metšo e seswai wa puša ya Josafata kgoši ya Juda. O feditše nywaga e lesome le metšo e mebedi a buša. ₂O dirile tše di bego di befela Morena; fela a se ke a etša tatagwe le mmagwe; gobane seswantšho sa Baali se se dirilwego ke tatagwe, o se tlošitše. ₃Fela, a kgomarela dibe tša Jerobeama morwa wa Nebata e a rutilego Isiraele go senya; tšona ga a ka a di lahla.

₄Mesa kgoši ya Moaba, ka gobane e be e le morui wa dinku, o be a loba kgoši ya Isiraele ka tšona, a ntšha dikgapa tše dikete tše lekgolo, le boya bja dinku tše dikete tše lekgolo. ₅Ya re mola Ahaba a hwile, kgoši ya Moaba ya hlanogela kgoši ya Isiraele. ₆Ke moka Jorama a tšwa Samaria a yo rapa Baisiraele ka moka. ₇A iša lentšu go Josafate lgoši ya Juda, a re: Kgoši ya Moaba e ntlhanogetše; tlaa re yo lwa le BaMoaba.

Josafate a re: Ke a tšwa. Ke selo setee le wena. Setšhaba ke setee le sa gago; le dipitsi tšaka ke tše tee le tša gago. ₈A botšiša a re: Re tlo tšwa ka tsela efe?

Yola a re: Re tlo tšea ka tsela ya lešoka la Edomo.

₉Ke moka, kgoši ya Isiraele le kgoši ya Juda, le kgoši ya Edomo, ba tšwa. Ya re ge ba šetše ba sepetše leeto la matšatši a šupago, ba hloka meetse a dira le a dikgomo tše ba tšwilego ba na natšo. ₁₀Kgoši ya Isiraele ya ba ya re: Joo! Dikgoši tše tharo tše, Morena o di biditše gore a di gafele diatleng tša Bamoaba. ₁₁Josafate a re: A ga go na moporofeta wa Morena mo, re tle re botšiše Morena ka yena?

E mongwe wa bahlanka ba kgoši ya Isiraele a fetola a re: Go na le Elisa morwa wa Safate, e a bego a hlapiša Elia.

₁₂Josafate a re: Go monna eo Lentšu la Morena le gona. Kgoši ya Isiraele, le Josafate, le kgoši ya Edomo, ba ya go yena.

₁₃Elisa a bolela le kgoši ya Isiraele a re: Ke na le taba mang nago? Yaa go baporofeta ba tatago, le go baporofeta ba mmago!

Kgoši ya Isiraele ya re: Aowaaai, Morena o biditše dikgoši tše tharo tše gore a di gafele diatleng tša Bamoaba!

₁₄Elisa a re: Ka bophelo bja Morena wa mašaba yo nna ke mo hlankelago, ge e ka be se go tsebafa Josafate kgoši ya Juda, nka be ke go gerula, ka se ke ka go sema selo. ₁₅Bjalo ntlišetšeng moletši wa seletšo.

Ya re ge moletsi a letša, seatla sa Morena sa tlela Elisa, ₁₆a re: Morena o re: Epang meletemelete mo moeding wo. ₁₇Gobane Morena o re: Le ka se ke la bona ledimo le ge e le pula. Le ge go le bjalo moedi wo o tlo tlala meetse, la tlo nwa le mehlape ya lena, le dikgomo tša lena. ₁₈Gomme tšeo Morena o re e sa le dinyane; le Bamoaba o tlo ba gafela diatleng tša lena. ₁₉Le tlo hula metse ka moka ya dibo, le metse e megolo ka moka. Le tlo rema dihlare tše botse ka moka, la thiba didiba ka moka tša meetse, mašemong a mabotse ka moka le tlo beletša mafsika.

₂₀Ka kgonthe ka moswana, ge go tlišwa sedimo sa sebego, ba tšhoga go etla meetse a etšwa thoko ya Edomo, naga ya tlala meetse.

₂₁Ge e le Bamoaba ka moka, ge ba ekwa gore ba šwahletšwe ke dikgoši tše tharo, ba epa dira, ba thoma ka bohle ba ba tsebago lerumo, go iša go ba ba sa le tsebego, ba tla ba ema mollwaneng. ₂₂Ya re ge ba tsoga ka moswana, letšatši la hlabela meetse; Bamoaba ba lebane nalo, ba bona meetse e le a mahubedu, e ke ke madi. ₂₃Ba re: Madi šea! Dikgoši di fedišane! Ba bolayane ka marumo! Hee lena Bamoaba! E re yeng re reboleng!

₂₄Ya re ge ba fihla mešašeng ya Baisiraele, Baisiraele ba tsoga ba fenya Bamoaba ba ba rakediša; ba tsena nageng ya bona ba ba bolaya; ₂₅ba phušola metse; ka moka ga bona ba beletša mafsika mo mašemong a mabotse; ba rema dihlare tše botse ka moka; gwa šala motse wa Kiriharesethe wa morako wa mafsika. Gwa tla ba diragamabje ba o dika, ba betša.

₂₆Kgoši ya Moaba ge e bona tlhabano e e thatafaletše, ya hlaola banna ba makgolo a šupago ba ba swerego ditšhoša, ya re ke šwahle ka mo go bego go le kgoši ya Edomo, mme ya šitwa. ₂₇Ke mo a tšerego morwa wa gagwe wa ntlha, e a bego a tlo mo hlatlama bogošing, a mo dira sedimo sa sehlabelo a le godimo ga morako. Baisiraele ba bona di ba befela gagolo, ba mo gomela ba boela ga gabo.