Amatsia le Asaria ba buša Juda. Isiraele go buša Jerobeama II
1Amatsia morwa wa Joase kgoši ya Juda o thomile go buša ka ngwaga wa bobedi wa Joase morwa wa Joahase kgoši ya Isiraele. 2Amatsia o be a na le nywaga e masome a mabedi a metšo e mehlano ge a eba kgoši, a buša a fetša nywaga e masome a mabedi a metšo e senyane a le motseng wa Jerusalema. Leina la mmagwe e be e le Joadane wa Jerusalema. 3O dirile tše di kgahlilego Morena; fela ga a ka a swana le Dafida tatagwe; ka gohle o be a etša Joase tatagwe. 4Ga a ka a fediša meboto; setšhaba se be se fela se iša didimo le diorelo mebotong.
5Ya re ge mmušo o napa o mo tiela, a bolaya bahlanka bala ba ba bolailego kgoši tatagwe. 6Fela, ga a ka a bolaya bana ba babolai bao; o dirile ka mo go ngwadilwego pukung ya melao ya Moše, e a laetšego a re: Botatago bana ba se ke ba bolaelwa bana ba bona; le bana ba se ke ba bolaelwa botatabo. E a kago bolawa o hwela sebe sa gagwe.
7O kile a fenya Baedomo mo Moeding wa letswai, e le ba dikete tše lesome, a thopa motse wa Sela ka ntwa, a o reela leina la Jokothiele; le lehono e sa le lona.
8Mehleng yeo Amatsia o kile a roma batseta, a iša lentšu go Joase morwa wa Joahase morwa wa Jehu kgoši ya Isiraele, a re: Tšwaa, re lebanye difahlogo! 9Joase kgoši ya Isiraele a iša phetolo go Amatsia kgoši ya Juda a re: Leokana la thabeng ya Libanone la na la iša lentšu go lerokwana la thabeng ya Libanoni, la re: Nea morwa waka ngwananyana wa gago e be mosadi! Gwa feta diphoofolo tša thabeng ya Libanoni, tša gatakanya leokana. 10Baedomo o ba fentše; bjale pelo ya gago e a ikgogomoša. Ithete o itulele gae. O reng o nyaka kotsi? O tlo wa, mme Juda o tlo wa nago.
11Amatsia a gana go kwa. Joase kgoši ya Isiraele a tšwa dira, ba tla ba lebanya difahlogo, yena le Amatsia kgoši ya Juda motseng wa Bethe Semese nageng ya Juda. 12Bajuda ba fenywa ke Baisiraele, ka moka ba tšhabela magaeng a bona. 13Joase kgoši ya Isiraele a swara Amatsia Kgoši ya Juda morwa wa Joase morwa wa Ahasia gona moo motseng wa Bethe-Semese; a tla Jerusalema a phušola morako wa Jerusalema go tloga ka kgorong ya Efuraimi go fihla ka kgorong ya sekhutlong, morako o fetšago meelo e makgolo a mane. 14A tšea digauta ka moka, le disilifera le dibja ka moka tše a di hweditšego Ngwakong wa Morena, le mo dipolokelong tša mošate; a tšea le batho ba go swarelela ka bona, a tsebo boela Samaria.
15Ge e le ditaba tše dingwe tša Joase, le tše a di dirilego, le tša bogale bja gagwe, le ka mo a lwilego le Amatsia kgoši ya Juda, naa ga di a ngwalwa mo pukung ya ditaba tša kgale tša dikgoši tša Isiraele? 16Joase o ithobaletše le botatagwe, a bolokwa go dikgoši tša Isiraele motseng wa Samaria; legatong la gagwe gwa buša Jerobeama morwa wa gagwe.
17Amatsia morwa wa Joase kgoši ya Juda a šala a sa phela mola Joase kgoši ya Isiraele a hwile; a fetša nywaga e lesome le metšo e mehlano a sa le gona. 18Ge e le ditaba tše dingwe tša Amatsia naa ga di a ngwalwa mo pukung ya ditaba tša kgale tša magoši a Juda?
19Mo motseng wa Jerusalema ba mo rerile ka bohwirihwiri; yena a tšhabela motseng wa Lakisi. Ba roma batho ba mo latiša gona moo Lakisi, ba mmolaela ntshe. 20Ba mo rwala ka dipitsi, ba mmoloka go botatagwe Jerusalema motseng wa Dafida. 21Setšhaba ka moka sa Juda sa tšea Asaria a sa na le nywaga e lesome le metšo e selelago fela, sa mmea kgoši legatong la Amatsia tatagwe. 22Ke yena a agilego motse wa Elathe, a o bušetša go Juda. Ke mola kgoši a šetše a ithobaletše le botatagwe.
23Jerobeama morwa wa Joase kgoši ya Isiraele o thomile go buša motseng wa Samaria ka ngwaga wa lesome le metšo e mehlano wa Amatsia morwa wa Joase kgoši ya Juda, a fetša nywaga e masome a mane a motšo o tee a le kgoši. 24A dira tše di befetšego Morena; mo go dibe tša Jerobeama morwa Nabata e a rutilego Isiraele go senya, Jerobeama ga a ka a lahla le setee. 25Ke yena a katološitšego naga ya Isiraele ya goma ka difateng tša Hamathi le ka lewatle la moeding; gwa phethega se Morena Modimo wa Isiraele a se boletšego ka mohlanka wa gagwe moporofeta Jona morwa wa Amithai wa Gathe-Hefere.
26Gobane Morena o be a bone mohlako wa Isiraele o babiša pelo ka kudu, go fedile ba bafsa le ba bagolo, Isiraele a se ne monamodi. 27Gomme Morena o be a sešo a bolela a re o tlo fediša leina la Isiraele ka tlase ga legodimo; ke ka baka leo a ba namoletšego ka seatla sa Jerobeama morwa wa Joase.
28Ge e le ditaba tše dingwe tša Jerobeama, le tšohle tše a di dirilego, le tša bogale bja gagwe ge a hlabana a thopolola Damaseko le Hamathi, e bego e le ya Juda, a e bušetša go Isiraele, naa ga di a ngwalwa mo pukung ya ditaba tša kgale tša dikgoši tša Isiraele? 29Jerobeama o ithobaletše le botatagwe, le magoši a Isiraele; legatong la gagwe gwa buša Sakaria morwa wa gagwe.
