Joahase le Joase ba buša Isiraele. Lehu la Elisa
1Ka ngwaga wa masome a mabedi a metšo e meraro wa Joase morwa wa Ahasia kgoši ya Juda, kwa Samaria gwa thoma go buša Joahase morwa wa Jehu kgoši ya Isiraele; a fetša nywaga e lesome la metšo e šupago a le kgoši. 2Yena o dirile tše di befetšego Morena, a latela dibe tša Jerobeama morwa wa Nebata, e a rutilego Isiraele go senya, gomme a se ke a tlogelana natšo. 3Ke ka baka leo bogale bja Morena bo tuketšego Isiraele, a ba gafela diatleng tša Hasaele kgoši ya Siria, le seatleng sa Benehadada morwa wa Hasaele lebaka leo ka moka. 4Joahase a ba a rapela a lebane le Morena; Morena a mo kwa, a bona mohlako wa Isiraele ge ba hlakišwa ke kgoši ya Siria. 5Morena a nea Isiraele monamodi, a ba namola seatleng sa Basiria; Baisiraele ba tsebo dula nywakong ya bona bjalo ka bomaabane le bo maloba. 6Le ge go le bjalo ga ba ka ba tlogela dibe tša Jerobeama yola e a rutilego Isiraele go senya, ba swara ka tsela ya tšona; le kokwane ya Ašera e be e fela e eme motseng wa Samaria.
7Ka kgonthe Joahase o be a se sa na batho, ge e se banamedi ba dipitsi ba masome a mahlano, le dikoloi tše lesome, le bahlabani ba dikete tše lesome, gobane kgoši ya Siria e be e ba feditše boka lerole lebatong.
8Ge e le ditaba tše dingwe tša Joahase, le tšohle tše a di dirilego, le tša bogale bja gagwe, naa ga di a ngwalwa mo pukung ya ditaba tša kgale tša dikgoši tša Isiraele? 9Joahase o ithobaletše le botatlagwe, ba mmoloka motseng wa Samaria; legatong la gagwe gwa buša Joase morwa wa gagwe.
10E be e le ka ngwaga wa masome a mararo a metšo e šupago wa Joase kgoši ya Juda, ge Joase morwa wa Joahase a eba kgoši ya Isiraele motseng wa Samaria; a buša a fetša nywaga e lesome le metšo e selelago. 11O dirile tše di befetšego Morena, a se ke a lahla le sebe setee sa tša Jerobeama morwa wa Nebata e a rutilego Isiraele go senya, a swara ka tsela ya tšona. 12Ge e le ditaba tše dingwe tša Joase, le tšohle tše a di dirilego, le tša bogale bja gagwe ka mo a nago a lwa le Amatsia kgoši ya Juda, naa ga di a ngwalwa mo pukung ya ditaba tša kgale tša dikgoši tša Isiraele? 13Joase o ithobaletše le botatagwe; sedulong sa gagwe gwa dula Jerobeama. Joase o bolokilwe le magoši a Isiraele motseng wa Samaria.
14Mola Elisa a babja, e le bolwetši bjo a hwilego ka bjona, gwa tla Joase kgoši ya Isiraele a mo hlola, a lla a lebane nae a re: Tata! Tata! Koloi ya Isiraele le banamedi ba yona!
15Elisa a mo rera a re: Swara bora le mesebe. Joase a swara bora le mesebe. 16Elisa a botša kgoši ya Isiraele a re: Nganga bora ka seatla sa gago. A bo nganga ka seatla sa gagwe. Elisa a bea diatla tša gagwe mo diatleng tša kgoši, 17a re: Bula lešoba la go leba bohlabela! A le bula. Elisa a re: Betša! A betsa. Elisa a re: Hee mosebemonamodi wa Morena! Mosebe monamoladiatleng tša Basiria! O tlo fenya Basiria kwa Afeke wa ba wa ba fediša!
18Elisa a buša a re: Swara mesebe! A e swara. A tsebo botša kgoši ya Isiraele a re: Tia lefase! A le tia gararo a kgaotša. 19Monna wa Modimo a napa a mo galefela a re: Ge o ka be o tiile lefase gahlano, o ka be o tlo fenya Basiria wa ba fediša; Basiria bjale o tlo ba fenya gararo fela.
20E kile ya re mola Elisa a šetše a hwile, mme ba mmolokile, gwa hlaga sera sa Bamoaba mathomong a ngwaga. 21Ya re ba sa boloka mohu e mongwe lebitleng leo, ba bona go etla sera; ba fo lahlela mohu eo lebitleng la Elisa. Mohu eo ge a gohlomela, a wela mašapong a Elisa; a boela a phela, a ema ka dinao.
22Hasaele kgoši ya Siria o be a fela a šwahlela Baisiraele mehleng yeo go sa phela Joahase. 23Fela, Morena a ba gaugela, a ba kwela bohloko, a ba boela ka baka la kgwerano ya gagwe, ye a e dirilego le Aborohama le Isaka le Jakobo; a se ke a rata go ba fediša, le bjale a se ke a ba lahla.
24Hasaele kgoši ya Siria a hwa, legatong la gagwe gwa buša morwa wa gagwe Benehadada. 25Gomme Joase morwa wa Joahase a thopolola go Benehadada morwa wa Hasaele metse yela ye Hasaele a bego a e thopile go Joahase tatagwe ka ntwa. Joase o bile o mo fentše gararo, a mo amoga metse yeo e bego e le ya Isiraele.
