Pušo e šoro ya Athalia. Joase wa Juda
1Athalia mmago Ahasia ge a bona gobane morwa wa gagwe o hwile, a tsoga a fediša bohle ba leloko la kgoši. 2Fela, Joseba morwedi wa kgoši Jorama kgaetšedi ya Ahasia, a tšea Joase morwa wa Ahasia, a mo utswa mo go bana ba kgoši ba ba bego ba bolawa, a mo uta phapošing ya marobalo a na le mofepi wa gagwe; Athalia a se mo hwetše, a se bolawe. 3A dula le mofepi wa gagwe a utilwe Ngwakong wa Morena, gwa ba gwa feta nywaga e selelago ya ge go buša Athalia.
4Ka ngwaga wa go šupa Joyada a roma lentšu a bitša balaodi ba dira tša mošate le dikala; ba tla go yena Ngwakong wa Morena, a lakana nabo, a ba eniša Ngwakong wa Morena; mme a ba šupetša morwa ela wa kgoši. 5A ba laela a re: Se le tlogo se dira sese: Le sera sa dikgao tše tharo. Sekgao se se tsenago ka Sabatha, se lete ngwako wa kgoši. 6Sekgao sa bobedi se eme mo kgorong ya Suru; sekgao sa boraro se eme mo kgorong ya ka nthago ga lena dikala tša go leta Ngwako. 7Dikgao tše pedi tša lena ka moka ba le tšwago ka Sabatha, le hlokomele Ngwako wa Morena, le lete kgoši. 8Le eme le dikologile kgoši, ka moka le swere marumo ka diatla. Gomme e a rego ke šwahla ka mo go lena, a bolawe; le ba go leta kgoši ge e tšwa le ge a tsena.
9Balaodi bao ba dira tše ba di laetšwego ke Joyada moperisita; ba rapa banna ba bona ba ba tšwago ka Sabatha, le bao ba ba boago ka Sabatha, ba tla go Joyada moperisita. 10Yena a ba nea marumo le dikotse tša Dafida, tše di bego di le Ngwakong wa Morena. 11Bjale dikala tša ema, ka moka ba swere marumo ka diatla; ba ema ka thoko ya le letona le ya la ntsogoso mo Ngwakong, ba bapetše le aletare, ba dikologile kgoši. 12Joyada a ntšha morwa wa kgoši, a mo rweša mofapahlogo, a mo nea lengwalo la Molao; mme ba mmea kgoši, ba mo tlotša, ba opa magofsi ba re: A kgoši e phele!
13Athalia ge a ekwa mogoo wa dikala le wa setšhaba, a tla lešabeng Ngwakong wa Morena. 14A bona kgoši e eme kokwaneng ka mo e bego e le mokgwa, bakgoma le baletši ba diphalafala ba le mo go kgoši, le setšhaba ka moka se thabile, ba letša diphalafala, Athalia a gagola Diaparo tša gagwe, a hlaboša lentšu a re: Joo, moferefere! Joo, moferefere!
15Joyada moperisita a laela balaodi ba dikgao, le balaodi ba dira, a re: Mo ntšhetšeng ka ntle ga Ngwako, a tšwe ka mo gare ga batho; e a kago mo latela a bolawe ka lerumo! Ka gobane moperisita o be a laetše gore a se ke a bolaelwa Ngwakong wa Morena. 16Ba mo iša matsogo; a re ge a fihla mo tsela ya dipitsi e tsenago ngwakong wa mošate, a bolaelwa ntshe.
17Joyada a diriša kgoši le setšhaba kgwerano le Morena, gore ba be setšhaba sa Morena; a gweranya kgoši le setšhaba. 18Bjale setšhaba ka moka sa naga yeo sa ya ngwakong wa Baali, sa phušola dialetare tša wona sa pšhatlaganya diswantšho tša wona; mme ba bolaya Mathane moperisita wa Baali gonamoo dialetareng.
Gomme Joyada a baakanya madišo a Ngwakong wa Morena. 19A bitša balaodi ba dikgao, le bakgoma, le dikala, le setšhaba ka moka sa naga yeo, ba tšwa ba na le kgoši Ngwakong wa Morena ba fologa ba na le yona, ba tla ka tsela ya kgoro ya dikala, ba fihla ngwakong wa mošate; kgoši ya dula sedulong sa dikgoši. 20Setšhaba ka moka sa thaba, motse wa ba le leago, mola ba bolaile Athalia ka lerumo ngwakong wa kgoši.
