2 BAKORINTHE 9

₁Ge e le modiro wa go thuša ba bakgethwa, ga se taba ye nkago hlwa ke le ngwalela yona. ₂Go ithapa ga lena ke a go tseba; ke be ke tumiša bjona ge ke botša ba Matsedonia ka re: Ba Akaya ba thomile ngwagola go lokiša, mme mafolofolo a lena a tutuwetša ba bantši. ₃Bjale bana bešo bao ke ba romile, gore tše re le tumišitšego ka tšona di rerefale gomme e be le lokišitše bjalo ka ge le boletše. ₄Gore e se be ge ba Matsedonia ba etla le nna, ba le hwetša le sešo la lokiša, rena ra tlo lewa ke dihlong -- a re se re: Lena -- ge tše re di boletšego di se gona. ₅Nna ke hweditše go swanetše, ge bana ba borena bao ke ba kgopela gore ba nthake pele, ba tle go lena ba lokiše ditshetšo tšeo di boletšwego, ke hwetše di lokišitšwe e le ditshetšo, e se neo tša ba nago le tseba.

₆Go bjalo: Mobjalakatseba o buna wa tseba; mobjalakatshetšo o buna wa tshetšo. ₇E mongwe le e mongwe a ntšhe ka mo a kwanego le pelo ya gagwe; a se ntšhe ka go belaela le ka go gapeletšwa, gobane Moneaathabile, Modimo o a mo rata. ₈Gomme Modimo o kgona go le atišetša dikgaugelo, la tlo rua tše di tlogo lekanela gohle; la tlo ekeletšwa ka tša go dira mediro e mebotse yohle; ₉Ka mo go ngwadilwego gwa thwe: Ga a time, o nea modiidi; go loka ga gagwe go eme go tiile mehla yohle. ₁₀Gomme yena Mosetšamobjadikapeu, Mosolelabatho dijo ba ja, le lena o tlo le setša a mediša peu ya lena, a atiša tše di tlogo tswalwa ke toko ya lena. ₁₁La tlo re le humišitšwe ka tšohle, la kgona go setša gohle, ya tlo ba gona go re lebogiša Modimo. ₁₂Gobane modiro wo wa go thuša ba bangwe ga se wa go fo tlatša mo bakgethwa ba hlaelwago, ke go atiša malebo a ba ba lebogago Modimo. ₁₃Ge ba bona matšo a modiro woo, ba tlo reta Modimo ba bone le le balatathuto ya Ebangedi ya Kriste, le tseba go setša le go ba batee le bona, le go ba batee le bohle. ₁₄Le gona ba tlo le beela dithapelo ba dula ba le hlologetšwe, ge ba bona kgaugelo ya Modimo mo go lena e le e kaakaa. ₁₅A Modimo a lebogwe ge a nea ka mokgwa wo wa go pala polelo.