2 BAKORINTHE 6

₁Le le ba go dirišana le Modimo re le eletša gore le se ke la ba ba ba amogetšego kgaugelo ya Modimo mme e se ke ya le hola selo. ₂Gobane o re: Ke go kwa ka lebaka la kgahlego; ke go thuša ka letšatši la phološo. Tsebang ge, lebaka la kgahlego ke la bjale; tšatši la phološo ke la lehono le.

₃Re realo re sa kgopiše motho le ka selo se tee, gore bohlanka bja rena bo se be le bosodi. ₄Dilong ka moka re re re bonale re le bahlanka ba Modimo: ka kgotlelelo e kgolo, re le ditlalelong, le bothateng, le pitlaganong, ₅le dikotlong, le dikgolegong, le meferefereng, re hloka boroko, re swerwe ke tlala, ₆re le ba go ila tšhila, ba tlhaologanyo, ba go se fele pelo, ba botho, ba Moyamokgethwa, ba lerato le se nago bomenetša, ₇re le ba lentšu la therešo, ba maatla a Modimo, re swere marumo a toko ka le letona le ka le letshadi, ₈re le ba go retwa le ba go gobošwa, ba go tumišwa le ba go sebja, re etša bafori mola re rereša, ₉re etša ba go se tsebje mola re tsebja, re etša ba ba hwago, mme ke rena ba, re a phela, re le baotliwa re sa bolawe, ₁₀re le ba ba nyamišwago, mola re le ba ba thabilego ka mehla, re le badiitšana mola re humiša ba bantši, re le bahloki, mola re ruile tšohle.

₁₁Lena Bakorinthe! Molomo wa rena o le ahlametše, pelo ya rena e katologile. ₁₂Mo pelong ya rena le hwetša go le bodulo; re bo hloka mo pelong tša lena. ₁₃Ntireng se ke le dirago sona; ke realo ka gore le bana ba ka. Le lena katološang dipelo.

₁₄Le se ke la ba ba go ikgokela jokong e šele ya ba ba sa dumelego; toko e ka amana bjang le bokgopo? Seetša se ka amana bjang le leswiswi? ₁₅Kriste a ka kwana bjang le Selalogi? Modumedi o abelana eng le e a sa dumelego? ₁₆Ntlokgethwa ya Modimo e agišana kae le medimo? Gomme lena le Ntlokgethwa ya Modimo e a phelago, ka mo Modimo a itšego: Ke tlo aga makgatheng a lena, mme lena le tlo ba setšhaba sa ka. ₁₇Tšwang ge moo gare ga bona, le khuduge; o realo Morena, le se sware tšhila. Ke mo ke tlogo le amogela. ₁₈Ke tlo ba Tata weno; mme lena le tlo ba barwa ba ka le barwedi ba ka. O realo Morena Ramaatlaohle.