2 KORONIKA 4

₁A dira le aletare ka mphiri. Botelele bja yona le bophara bja yona e be e le meelo e masome a mabedi, boemo e be e le meelo e lesome. ₂A dira le mogopo o mogolo o tšholotšwego, wo e bego e re ge o elwa go tloga morumong go ya morumong wa ka thoko yela, ya ba meelo e lesome; leemo e be e le meelo e mehlano; lenti la go dikologa le morumo le be le tšea meelo e masome a mararo. ₃Ka tlase ga morumo o be o dikologwa ke diswantšho tša maraka; maraka a lesome a tšea sebaka sa moelo o tee, a dikologa le mogopo thoko tšohle e le melokoloko e mebedi ya maraka. ₄Mogopo wo o be o beilwe godimo ga dikgomo tše lesome la metšo e mebedi; tše tharo di lebile leboa; tše tharo di lebile bodikela; tše tharo di lebile borwa; tše tharo di lebile bohlabela; mogopo o be o rwelwe ke tšona di išitše marago ka teng. ₅Ge e le bokoto bja tshipi ya mogopo woo bo be bo lekana le bophara bja seatla; gomme morumo wa wona o be o swana le wa lefišwana le letšoba ge le palegile. Mogopo wo o be o tlala ge o tšhetšwe meeta e dikete tše tharo. ₆A dira le dihlapelo tšela tše lesome; tše tlhano tša bewa ka thoko ya le letona; tše tlhano tša bewa ka thoko ya la ntsogošo; e be e le tša go hlapela mo go tšona, le tša go hlatswa dilo tša dihlabelo. Mogopo o mogolo e be e le wa go hlapela baperisita.

₇A dira le dihlomapone ka gauta, tše lesome, ka go ya ka diswantšho tša tšona; a di bea mo Ntlongkwethwa; tše tlhano tša bewa ka go le letona; tše tlhano tša bewa ka go la ntsogošo. ₈A dira le dithalana tše lesome, a di bea Ntlongkgethwa; tše tlhano tša bewa ka go le letona; tše tlhano tša bewa ka go la ntsogošo; a dira le meruswi e lekgolo ka gauta.

₉A dira lapa la baperisita, le lapa le legolo, le difero tša malapa; mamati a difero a a manega ka mphiri. ₁₀Mogopo o mogolo o o beile ka thoko ya borwa, mo lehlakore la thoko ya bohlabela le gomago ka thoko ya borwa.

₁₁Hurama o dirile le mabeana le meruswi ya go fokela, a ba a phetha mediro ye a e diretšego kgoši Salomo Ngwakong wa Modimo. ₁₂Le dikokwane tše pedi tšela, le dikgokolwana tša tšona, le dihlogo tše pedi tša go bewa godimo ga tšona, le malokwa ala a go apeša dihlogo, ₁₃le dikgokolwana tše di etšago marapa tše makgolo a mane tše di bego di kgoketšwe malokweng ya ba melokoloko e mebedi ya marapa mo malokweng a go apeša dihlogo tša dikokwane kwa dintlheng tša tšona. ₁₄A dira le dikoloinyana tšela tša go bea megopo yela ya go hlapa. ₁₅A dira mogopo o mogolo, le dikgomo tše lesome la metšo e mebedi tša go o rwala, ₁₆le dipitša, le mabeana, le dihlaba, le dilwana tša modiro woo ka moka.

Ke tšona tše Hurama-Abi a di diretšego kgoši Salomo, gore e be tša ngwako wa Morena. O di dirile ka mphiri o ritetšwego.

₁₇Kua molaleng wa noka ya Jorodane, mo mmu e lego o montši, gare ga Sukothe le Tsereda, ke gona mo kgoši e laetšego gore di tšhollwe gona. ₁₈Gomme dilo tšeo ka moka kgoši Salomo o di dirile e le tše ntšintši, gobane mphiri e be e le o montši o sa elwe boima.

₁₉Salomo a dira dilo ka moka tša Ngwako wa Modimo, e lego aletare ya gauta, le dithalana tšela tša go bea dinkgwaponwa, ₂₀le dihlomapone, le dipone tša tšona tša gautatshekegi, tša go gotetšwa pele ga sekgethwakgethwa ka mokgwa wa tšona, ₂₁le matšoba a mo diponeng, le matlaonyana a gauta; e be e le tša gautatshekegi. ₂₂A dira le mefaka; le meruswi ya go fokela, le mabeana a go thuntšha diorelo, le megopšana; ka moka e be e le tša gauta e botse; le mojako wa Ngwako, le mamati a wona a sekgethwakgethweng, le mamati a Ntlokgethwa e be e le a gauta.