2 KORONIKA 3

₁Gomme Salomo a thoma go aga Ngwako wa Morena motseng wa Jerusalema thabeng ya Moriya, mo Morena a kilego a bonwa ke Dafida tatagwe felo mo Dafida a go lokišitšego seboeng sa Oranani Mojebusi. ₂O thomile go aga ka tšatši la bobedi la kgwedi ya bobedi ya ngwaga wa bone a le kgoši. ₃Metheo ya Ngwako wa Modimo ka mo Salomo a e beilego še: Botelele e be e le meelo e masome a selelago ka kelo ya kgale; bophara e be e le meelo e masome a mabedi. ₄Mathudi botelele bja ona e be e le meelo e masome a mabedi, a lekana le bophara bja Ngwako; leemo e be e le meelo e lekgolo le masome a mabedi; ka teng a a manega ka gautatshekegi. ₅Maboto a Ngwako o mogolo a a apeša ka mamati a megobogobo a a manegilwego ka gauta e botse, a a thakga ka diswantšho tša melala le tša matšoba. ₆A thakga leboto ka magakabje a bohlokwa ya ba botšhepi; gauta yona e be e le ya Parafaima. ₇Ge e le Ngwako wo, dikota tša hlaka ya wona, le direpodi, le maboto a wona, le mamati a mejako ya wona, ka moka o di manegile ka gauta, a seta diswantšho tša Bakerubi mabotong. ₈A dira le Ngwako wa sekgethwakgethwa, wo o bego o lekana bophara le botelele bja wona, e le meelo e masome a mabedi, a manega maboto a wona ka gauta e botse ya talente tše makgolo a selelago. ₉Boima bja dimapolo e be e le Sekele tše masome a mahlano tša gauta. Le phapoši tša godimo a di manega ka gauta.

₁₀Ka Ngwakong wa sekgethwakgethwa a dira Bakerubi ba babedi, e le modiro wa bomakgone ba babetli; Bakerubi a ba manega ka gauta. ₁₁Diphego tša Bakerubi ba di be di akaretša bophara bja meelo e masome a mabedi; lefego letee le be le na le meelo e mehlano, la kgotla ka leboto thoko yeno; le lengwe e be e le la meelo e mehlano le lona, la kgotla ka leboto lela; mafego a mangwe a ka gare, a be a kgotlana ka dintlha a na le meelo e mehlanomehlano. ₁₂Diphego tša Bakerubi ge di kgotlana le maboto ka thoko ye le ka thoko ye, mme tša gare di kgotlana ka dintlha, ka moka e le tša meelo e mehlanomehlano, ₁₃diphego di phurulogile ka mokgwa wo, di be di tšea sebaka sa meelo e masome a mabedi. Bakerubi ba be ba eme ka maoto, ba lebišitše difahlogo ka Ngwakong. ₁₄A dira lešira la purapura e tala le e khubedu, le ka moretele wa leokodi, la logwa la ba le diswantšho tša Bakerubi.

₁₅Pele ga Ngwako a emiša dikokwane tše pedi. Botelele bja tšona e be e le meelo e masome a mararo a metšo e mehlano; dihlogo tša tšona ya ba meelo e mehlano gape. ₁₆A dira lokwa la diketane morumong wa ka tlase wa dihlogo tšeo, a le kgokela gona moo godimo ga dikokwane; a dira dikgokolo tse lekgolo tše di etšago marapa, a di kgokela diketaneng tšeo. ₁₇Dikokwane tše a di emiša mojako wa Ntlogethwa ka go le letona le ka go la ntsogošo. Kokwane ya go le letona a re ke Jakini (o tiišitše), ya go la ntsogošo a re ke Boase (maatla).