Pušo e botse ya Hiskia
1Hiskia o be a na le nywaga e masome a mabedi a metšo e mehlano ge a tšea bogoši, a fetša nywaga e masome a mabedi a metšo e senyane a le kgoši motseng wa Jerusalema. Leina la mmagwe e be e le Abia morwedi wa Sekaria. 2Yena o dirile tše di bego di kgahla Morena, a etša Dafida tatagwe.
3Ka ngwaga wa pele a sa tšo thoma go buša, a bula mejako ya Ngwako wa Morena, a e tsoša. 4A bitša baperisita ba phuthegela lepatlelong la ka thoko ya bohlabela, 5a bolela le bona a re: Nkweng, lena Balefi! Bjale ikgetheng, le kgethe le Ngwako wa Morena Modimo wa botataweno; mme makgapha a lego fa sekgethweng le a ntšhetše ntle. 6Gobane botatawešo ba be ba arogile, ba dira tše di befetšego Morena Modimo wa rena; ba mo lahlile ba gerula bodulo bjo bja Morena, ba bo fularela. 7Ba bile ba tswaletše le mejako ya mathudi; ba timile dipone, ba lesa go thuntšha diorelo, ba lesa go tlišetša Morena Modimo wa Isiraele dihlabelo fa sekgethweng. 8Ke ka baka leo Juda le Jerusalema ba wetšwego ke kgalefo ya Morena, a ba gafa, ba ba setšhošetši le sebogelo le sekwero, ka mo le di bonago ka mahlo a lena. 9Ka kgonthe ke tšona tše di bolaišitgego botatawešo ka lerumo, barwa ba rena le barwedi ba rena le basadi ba rena ba tloga ba thopilwe.
10Bjale pelo ya ka e re: A re boelaneng le Morena Modimo wa Isiraele, gore mollo wa bogale bja gagwe o re timele. 11Ke gona, bana ba ka, le se ke la tšwafa; gobane ke lena ba Morena a ikgethetšego bona a re le eme pele ga sefahlogo sa gagwe, le mo direle le le bahlanka ba gagwe ba go mo thuntšhetša diorelo.
12Ke moka Balefi ba tsoga. E be e le Mahathe morwa wa Amasai, le Joele morwa wa Asaria wa barwa ba Kahathe. Go barwa ba Merari e be e le Kisi morwa wa Abadi, le Asaria morwa wa Jehalaliele. Go barwa ba Gerisome e be e le Joa le Sima, le Edeni morwa wa Joa. 13Go barwa ba Elitsafane e be e le Simiri le Jehiele. Go barwa ba Asafa e be e le Sekaria le Mathanya. 14Go barwa ba Hemane e be e le Jehiele le Simei. Go barwa ba Jeduthune e be e le Semaya le Usiele.
15Bona ba ba botha bana ba bobona, ba ikgetha, ba dira se kgoši e ba laetšego sona ka lentšu la Morena, ba tsena ba thakga Ngwako wa Morena. 16Baperisita ba tsena ka mo Ngwakong wa Morena ba o thakga, ba ntšha ditšhila ka moka tše ba di hweditšego gona moo Ntlongkgethwa ya Morena, ba di lahlela ka mo malapeng a yona; Balefi ba di tšea ba di iša kua ntle molapong wa Kidirone.
17Ba be ba thomile go o thakga ka letšatši la pele la kgwedi ya pele; ka la seswai ba tsena mathuding a Morena, ba kgetha Ngwako wa Morena ba dira matšatši a seswai, ba fetša ka la lesome le metšo e selelago la yona kgwedi yeo ya pele.
18Ba tsebo tsena go kgoši Hiskia, ba re: Re thakgile Ngwako wa Morena ka moka, le aletare ya dihlabelo le dibjana tša yona ka moka, le sethalana sa dinkgwaponwa le dibjana tša sona ka moka, 19Le dibjana tšela ka moka tše kgoši Ahasi a bego a di gobošitše mola go buša yena, re di lokišitše ra di kgethela Morena; šedile pele ga aletare ya Morena.
20Ka la ka moswana e sa le bošego, kgoši Hiskia a tsoga, a botha bagolo ba motse, a rotogela Ngwakong wa Morena. 21Ba tliša dipowana tše di šupago, le dikgapana tše di šupago, le dikwana tše di šupago, le dipudi tše di šupago, ya ba seloba sa mmušo, le sa sekgethwa, le sa Juda; ba laela baperisita barwa ba Arone gore ba di hlabe aletareng ya Morena. 22Ba hlaba dikgomo tšeo; baperisita ba tšea madi ba a fokela aletareng. Ba hlaba dikgapa, ba fokela madi aletareng. Ba hlaba dikwana, ba fokela madi aletareng. 23Ba tliša dipudi tšela, ya ba seloba sa kgoši le sa phuthego, ba di bea diatla dihlogong tša tšona. 24Baperisita ba di hlaba, ba tliša madi a tšona aletareng, ya ba seloba sa go direla Baisiraele ka moka poelannyo; gobane kgoši e be e laetše gore Baisiraele ka moka ba direlwe sehlabelo le seloba.
25A emiša Balefi mo Ngwakong wa Morena ba swere meropa, le makope, le diletšo, ka mokgwa o laetšwego ke Dafida, le Gada mmoni wa kgoši, le Nathane moporofeta. Gobane mokgwa wo o be o beilwe ke Morena ka baporofeta ba gagwe. 26Gomme Balefi ba ema ba swere diletšo tša Dafida; baperisita ba ema ba swere diphalafala. 27Ke moka Hiskia a laela a re dihlabelo di išwe aletareng. Gomme ge ba thoma go iša dihlabelo, ba hlabelela kopelo ya Morena, go letšwa diphalafala le diletšo tša Dafida kgoši ya Isiraele. 28Ge go opelwa kopelo, phuthego ka moka ya khunama, baletši ba letša diphalafala; gwa dirwa ka mokgwa wo, sehlabelo sa be sa phethwa. 29Ge sehlabelo se phethegile, kgoši ya khunama, le bohle ba ba bego ba na nayo ba lotšha. 30Gomme kgoši Hiskia le bakgoma ba laela Balefi gore ba rete Morena ka dikoša tša Dafida le tša Asafa mmoni. Ba reta ba thabile; mme ba khunama ba rapela.
31Kgoši Hiskia a fetša ka go re: Bjale ge le ikgafetše Morena ka mokgwa wo, batamelang le tliše dihlabelo le dileboga Ngwakong wa Morena. Phuthego ya tliša dihlabelo le dileboga; le mang le mang e a bego a ithapa, a tliša sehlabelo. 32Gomme palo ya dihlabelo tše di tlišitšwego ke phuthego, e be e le dikgomo tše masome a šupago, le dikgapana tše lekgolo, le dikwana tše makgolo a mabedi, ya ba dihlabelo tša Morena. 33Gomme dineo tše kgethwa e be e le kikgomo tše makgolo a selelago, le dinku tše dikete tše tharo. 34Fela, baperisita ba be ba sa lekane go tswia dikgomo tša dihlabelo tšeo; ba tlatšwa ke bana babo ba Balefi, ba ba ba fetša modiro woo. Baperisita ba bangwe ba be ba sa ikgetha; Balefi bona ba be ba akgofile go ikgetha; gwa diega baperisita. 35Dihlabelo tšona e be e le tše ntši, le makhura a dileboga, le dibego tša go tla le dihlabelo.
Ba dirile ka mokgwa wo ge ba tsoša modiro wa go hlankela Morena Ngwakong wa gagwe. 36Hiskia a thaba le setšhaba ka moka ka baka la tše Morena a di theilego mo setšhabeng se; ka gobane taba ye e be e diregile ka pela.
