2 KORONIKA 27

₁Jothama o be a na le nywaga e masome a mabedi a metšo e mehlano ge a tšea bogoši; a fetša nywaga e lesome la metšo e selelago a le kgoši motseng wa Jerusalema. Leina la mmagwe e be e le Jerusa morwedi wa Tsadoko. ₂O dirile tše di bego di kgahla Morena, a etša Usia tatagwe. Fela, o be a sa ye Ngwakong wa Morena, mme setšhaba sa fela se senyega.

₃Ke yena a agilego kgoro ya ka tletlolo ya Ngwakong wa Morena; le merakong ya Ofele ke yena a agilego gagolo. ₄A aga le metse dithabeng tša Juda; mo dikgweng a aga ditšhabelo le dibo. ₅O kile a hlabana le kgoši ya Baamoni, a ba fenya, ba loba ka Talente tše lekgolo tša silifera, le ka mekotla e dikete tše lesome ya mabele, le ka mekotla e dikete tše lesome ya leotša; ba di ntšha ka ngwaga woo le ka ngwaga wa bobedi le ka ngwaga wa boraro. ₆Gomme Jothama a tia maatla, ka gobane o be a sa fapane le Morena ditseleng tša gagwe. ₇Ge e le ditaba tše dingwe tša Jothama, le tša ditlhabano tša gagwe, le mediro ya gagwe, šedile di ngwadilwe pukung ya dikgoši tša Isiraele le tša Juda. ₈O be a na le nywaga e masome a mabedi a metšo e fetšago seatla ge a tšea bogoši, a fetša nywaga e lesome la metšo e selelago a le kgoši motseng wa Jerusalema. ₉Jothama o ithobaletše le botatagwe; ba mmolokile motseng wa Dafida; legatong la gagwe gwa buša Ahasi morwa wa gagwe.