Josafate of fenya manaba
1Ka lebaka le lengwe le le tlilego gwa rotoga Bamoaba, ba na le Baamoni, le ba bangwe ba mohuta wa bona, ba tla go lwa le Josafate. 2Gwa tla ba ba botšago Josafate ba re: O šwahlelwa ke mašaba a magolo; ba tšwa mošola wa lewatle kua Siria. Seba, ba šetše ba le Hatsetsoni Thamara, fa moeding wa Engedi. 3Josafate a tšhoga, a lebiša sefahlogo sa gagwe go nyaka Morena; a laela gore go ikonwe dijo nageng ka moka ya Juda. 4Gomme Bajuda ba phuthegela go rapela Morena, ba tla ba etšwa metseng ya Juda, ba nyaka Morena. 5Josafate a ema mo phuthegong ya Juda le Jerusalema Ngwakong wa Morena mo pele ga lapa le lefsa, 6a rapela a re: Morena Modimo wa botatawešo! A ga o Modimo wa kua magodimong? A ga o mmuši wa mebušo ya ba ditšhaba ka moka? Go wena ke mo go lego maatla le bogale; gomme ga go e a kago ema a lwa nago. 7A ga se wena Modimo wa rena e o rakilego beng ba naga ye mola go fihla sa gago setšhaba sa Isiraele, wa e nea ditlogolo tša Aborahama moratwa wa gago, e be ya bona ka go sa felego? 8Ba dula mo go yona, ba go agela sekgethwa sa leina la gago mo go yona, 9sa go re mohla re welwa ke kotsi, e ka ba lerumo, goba kotlo, goba dinkhu, goba tlala, re tle re eme re lebane le Ngwako wo le sefahlogo sa gago, ka ge leina la gago le le fa Ngwakong wo, re go llele re le tlalelong, mme wa re kwa wa re namolela.
10Bjale šeba, Baamoni le Bamoaba le ba dithabeng tša Seire, bao o kilego wa iletša Baisiraele go phatša naga ya bona mola ba sa tšwa Egipita; ba šikologa ba se ba fediše. 11Seba, ba tlilo itefeletša mo go rena ka go re raka mo nageng ya gago ye o re agišitšego mo go yona. 12Modimo wa rena! A o ka se ahlole wa ba lahla naa? Gobane rena ga re na maatla ge go fihla mašaba a makaakaa a re šwahlela. Ga re tsebe se re kago se dira; mahlo a rena a lebeletše wena.
13A realo, Bajuda ka moka ba eme pele ga Morena, le bana ba bona, le basadi ba bona, le barwa ba bona. 14Ba sa eme ba phuthegile, moya wa Morena wa tlela Jehasiele morwa wa Sekaria morwa wa Benaya morwa wa Jeiele morwa wa Mathanya Molefi wa barwa ba Asafa, 15a re: Lena Bajuda ka moka, le baagi ba Jerusalema, le wena kgoši Josafate, theetšang! Morena o bolela le lena o re: Le se ke la boifa mašaba a makaakaa a; le se ke la a tšhoga; gobane ntwa ga se ya lena, ke ya Modimo. 16Ka moswana le tlo theogela go bona, le tlo hwetša ba rotoga le mmoto wa Hatsitse; le tlo gahlana nabo mo go gomago molapo o bataganego le molala wa Jeruele. 17Ga se lena le tlogo hlabana fao. Le batamele le eme, le bone ge Morena a phološa, a na le lena, Juda le Jerusalema, le se ke la boifa; le se ke la ba tšhoga. Ka moswana le ba tšwele; Morena o tlo ba le lena.
18Josafate a inama a khunama; gomme Bajuda ka moka le baagi ba Jerusalema ba khunama ba rapela Morena. 19Balefi barwa ba Kahathe le ba Kora ba ema ba reta Morena Modimo wa Isiraele ka mantšu a magolo ka kudu.
20E sa le bošego ba tsoga ba tšwela lešokeng la Thekoa. Ba sa tšwa, Josafate a ema a re: Nkweng, lena Bajuda le baagi ba Jerusalema! Botang Morena Modimo wa lena; dumelang baporofeta ba gagwe, ke mo le tlogo atlega. 21Ya re ge a lakane le ba madira, a beela Morena baopedi gore ba rete ba apere tše kgethwa tša botšhephi, ba ete bahlabani pele, ba gobele ba re: Lebogang Morena, gobane ke yo botse, yo botho bja neng le neng!
22Ya re ge ba sa ile le megobo le ditheto, ke ge Morena a šetše a ntšhitše ba sekhung, ba lwa le Baamoni le Bamoaba le ba dithabeng tša Seire, ba ba bego ba tlile go lwa le Juda, ba ba bolaya. 23Baamoni le Bamoaba ba hlanogela bala ba dithabeng tša Seire, ba ba bolaya ba ba fediša; ya re ge ba fedišitše ba dithabeng tša Seire, ba senyana seng sa bona ba bolayana. 24Bajuda ge ba fihla mmotong mo ba bonago tša molaleng, ba iša mahlo mo go bego go le mašaba ala, ba bona ditoto di rapaletše fase, go se e a phonyokgilego.
25Josafate a tla a na le batho ba gagwe ba hwetša thoto e ntši mo go bego go le ditoto, le dilwana tša bohlokwa; ba rebola tše ntši, ba ba ba šitwa go di rwala, ba fetša matšatši a mararo ba rebola, gobane e be e le tše ntšintši. 26Ka tšatši la bone ba phuthegela moeding wa ditheto, gobane ke mo ba nago ba reta Morena; mme leina la felo fao le nankhono e sa le Moedi wa Ditheto. 27Bajuda le ba Jerusalema ba boa, Josafate a ba etile pele, ba tla Jerusalema ba thabile, ba thabela tše Morena a di dirilego manaba a bona. 28Ba goroga Jerusalema ka diletšo le ka makope le ka dinaka, ba ya Ngwakong wa Morena. 29Ba mebušo ka moka ya dinaga, ge ba ekwa gobane Morena o lwile le manaba a Isiraele, ba welwa ke go tšhoga Morena. 30Mmušo wa Josafate wona wa iketla, Morena Modimo wa gagwe a mo fa leago thoko tšohle.
31Josafate o bušitše Juda ka mokgwa woo. Mola a thomago go buša o be a na le nywaga e masome a mararo a metšo e mehlano; a fetša nywaga e masome a mabedi a metšo e mehlano a le kgoši motseng wa Jerusalema. Leina la mmagwe e be e le Asuba morwedi wa Silihi. 32O be a swere ka tsela ya Asa tatagwe, a se ke a aroga, a dira tše di bego di kgahla Morena. 33Tše di sa kago tša fedišwa ke meboto, gobane dipelo tša batho di be di sešo tša botegela Modimo wa botatabo.
34Ge e le ditaba tše dingwe tša Josafate, tša ge a thoma a ba a goma, šedile di ngwadilwe mo pukung ya Jehu morwa wa Hanani, tša tsena mo pukung ya dikgoši tša Isiraele.
35Ka morago Josafate kgoši ya Juda a gwerana le Ahasia kgoši ya Isiraele, yola wa mekgwa e mebe. 36O be a gwerane le yena ka go dira maselawatle go tlo ya Tarasisi; ba a dira motseng wa Etsionegebere. 37Gwa tla Eliesere morwa wa Dodofa wa Maresa, a porofetela Josafate a re: Morena o šetše a sentše modiro wa gago, ka gobane o gwerane le Ahasia. Ka kgonthe maselawatle a robega, a šitwa go ya Tarasisi.
