2 KORONIKA 17

₁Josafate morwa wa gagwe a buša legatong la gagwe, a tiiša go lwa le Isiraele. ₂A bea dira metseng ka moka ya Juda ya dibo, a bea bahlapetši nageng ya Juda le ya Efuraimi ye tatagwe a bego a e thopile. ₃Morena a ema le Josafate ka gobane o be a swere ka tsela tša Dafida tša mohlamonene, a se ke a nyaka Mobaali. ₄A nyaka Modimo wa tatagwe, a swara tsela ya melao ya Morena, a se ke a ya ka mekgwa ya Isiraele. ₅Morena a tiišeletša mmušo seatleng sa Josafate, Bajuda ka moka ba mo ntšhetša dibego, a atelwa ke mahumo, a retwa gagolo. ₆Pelo ya gagwe e be e phafogetše ditsela tša Morena, a ba a fediša meboto le dikokwane tša Ashera nageng ya Juda.

₇Ka ngwaga wa boraro wa pušo ya gagwe a roma matona a gagwe, a re a yo ruta batho metseng ya Juda; e be e le Benehaile, le Obadya, le Sekaria, le Nethaniele, le Mikaya; ₈ba ya ba na le Balefi boSemaya, le Nethanya, le Sebadya, le Asaele, le Semiramothe, le Jonathane, le Adonia, le Tobia, le Tobi-Adonia, ba e bego e le Balefi; ba ya ba na le Elisama le Jorama ba e bego e le baperisita. ₉Ba ruta batho nageng ya Juda ba swere puku ya melao ya Morena, ba sepela le metse ka moka ba ruta setšhaba.

₁₀Mebušo ya dinaga ka moka tše di dikologago Juda e be e wetšwe ke go tšhoga Morena, ya se ke ya lwa le Josafate. ₁₁Go Bafilisita go tšwele ba ba tlišetšago Josafate dibego, ba tla ba rwele disilifera. Baarabia ba mo tlišetša dihuswane, dinku tše dikete tše di šupago le makgolo a šupago, le diphoko tše dikete tše di šupago le makgolo a šupago. ₁₂Josafate a fela a gola a eya, a ba yo mogolo ruri, a aga metse ya dibo le ya matlolo nageng ya Juda. ₁₃O be a na le mediro e mentši mo metseng ya Juda, a na le banna ba bahlabani ba bagale motseng wa Jerusalema. ₁₄Palo ya bona še, ge go iwa ka meloko ya bona: Nageng ya Juda ba e bego e le balaoladikete šeba: Ke mokgoma Adana e a bego a na le banna ba bagale ba dikete tše makgolo a mararo. ₁₅A hlatlangwa ke mokgoma Johanana e a bego a na le ba dikete tše makgolo a mabedi a masome a seswai. ₁₆A hlatlangwa ke Amasia morwa wa Sikiri e a bego a ikgafetše Morena ka go rata, e a bego a na le banna ba bagale ba dikete tše makgolo a mabedi. ₁₇Go Babenyamini monna yo bogale e be e le Elyada; o be a na le ba dikete tše makgolo a mabedi ba ba swerego bora le kotse. ₁₈A hlatlangwa ke Josabadi e a bego a na le banna ba dikete tše lekgolo la masome a seswai ba ba bego ba swere dibetša tša ntwa. ₁₉Ke bona ba ba bego ba leta kgoši, go sa balwe ba kgoši e bego e ba beile metseng ya dibo mo go fela nageng ya Juda.