1 TIMOTHEO 5

₁Mokgalabjye o se ke wa mo kgalema ka thata. O mo eletše bjalo ka eke ke tatago. Masogana o a eletše bjalo ka eke ke bongwaneno. ₂Bakgekolo o ba eletše bjalo ka eke ke bommago. Basadi ba bafsa o ba eletše bjalo ka eke ke bokgaetšedi ka mokgwa o mokgethwa wa ruri.

₃Basadi ba bahlologadi o ba godiše; ke ra bao e lego bahlologadi ba ruri. ₄Ge mohlogogadi a na le bana le ge e le ditlogolo, go bona bao sa pele a e be go ithuta borapedi ka lapa: e be go leboga batswadi ba bona. Ke gona go thakga le go kgahla Modimo. ₅Ge e le mohlologadi e a šiilwego a nnoši, o holofela Modimo, o tiiša dithapelo le kgopelo bošego le mosegare. ₆E a ilego le dikganyogo, yena o hwile le ge a sa phela. ₇Le tšona tše o ba laele, gore ba ile bosodi. ₈Ge motho a sa babalele babo, gagolo ba lapeng la gabo, o latola tumelo; o phalwa ke e a sa dumelego.

₉Mohlologadi e a kgethwago ke phuthego a e be e a feditšego nywaga e masome a selelago, e a bego a tšerwe gatee fela, ₁₀a e be e a nago le bohlatse bja mediro e botse, bja ge a tsebile go diša bana le go amogela baeng, le go hlapiša bakgethwa maoto, ge a thušitše batlaišegi, ge e le wa go phegelela mediro e botse yohle.

₁₁Bahlologadi ba bafsa o se ke wa ba hlaolela modiro wa phuthego; gobane ge ba ikwa ba ngala Kriste, mme ba rata go tšewa. ₁₂Mme molato wa bona e ba go hlanoga, ba thomile go dumela. ₁₃Le gona ba tlwaela go theta le malapa ba se na modiro; e se ke ya ba go tšwafa fela, ya ba ditshele le go bolela tše di sa lokago. ₁₄Ke gona ke ratago gore ba bafsa ba tšewe, ba belege bana, ba ditše malapa a bona, gore lenaba ba se le nee sebaka sa go roga. ₁₅Gobane ba bangwe ba bile ba hlanogile, ba šala Sathane morago. ₁₆Ge motho e le modumedi, mme mo go ba gabo go na le bahlologadi, a a ba babalele gore phuthego e se tlo imelwa; sa yona e be go babalela ba e lego bahlologadi ruri.

₁₇Ba bagolo ba go emela phuthego gabotse, a ba godišwe gobedi, gagolo bao ba go itapiša ka go bolela le ka go ruta. ₁₈Gobane mangwalo a re: Pholo ge e fola o se ke wa e tlemelela molomo; a buša a re: Modiri o swanetšwe ke moputso. ₁₉Ge mogolo a ka begwa, o se ke wa amogela taba yeo ge e se ne dihlatse tše pedi le ge e le tše tharo. ₂₀Ba ba sentšego o ba sole bohle ba le gona, gore le ba bangwe ba tšhoge.

₂₁Ke go laela pele ga Modimo le Morena Jesu Kriste le Barongwa ba bakgethwa, gore o itote gore o se ke wa ahlola go sešo gwa sekwa, o se ke wa beba motho. ₂₂O se ke wa hlaganela go bea motho diatla. O se ke wa hwetšwa o na le molato le bosenyi; itote o ile bosodi.

₂₃O se hlwe o enwa meetse fela; nwaa le beinenyana ka baka la mala a gago, le bokoka bjoo bo felago bo go boela.

₂₄Dibe tša ba bangwe di a bonala, di ba eta pele kahlolong; tša ba bangwe di ba latela morago. ₂₅Le mediro e botse ya ba bangwe e a bonala; ge go e mongwe e sa bonale, e ka se dule e fihliwe.