Baisiraele ba fenya Bafilisita ba na le Samuele
1Batho ba Kiryathe-Jearima ba tla ba rwala polokelo ya Morena, ba e iša ngwakong wa Abinadaba, o lego mmotong. Ba kgetha Eleasara morwa wa gagwe gore a lete polokelo ya Morena.
2Polokelo ya dula gona moo Kiryathe-Jearima, matšatši a atafala, ya ba nywaga e masome a mabedi. Setšhaba ka moka sa Isiraele sa lla se llela Morena.
3Ke mo Samuele a boletšego le bohle ba setšhaba sa Isiraele, a re: Ge le rata go boela go Morena ka dipelo tša lena ka moka, gona tlošang medimo e šele e lego mo go lena, Boasiterothe; gomme dipelo tša lena di dule di lebile Morena, le hlankele yena a nnoši; ke mo a tlogo le namolela diatleng tša Bafilisita. 4Ke moka Baisiraele ba tloša Bobaali le Boasiterothe mo go bona, ba hlankela Morena a nnoši.
5Samuele a re: Bothang Baisiraele ka moka ba tle Mitsipa, gore ke le rapelele go Morena. 6Ba kgobakana ba tla Mitsipa; ba ga meetse ba a tšhollela pele ga Morena; ba ikona dijo mohla woo, ba ipolela ba le gona moo ba re: Re senyeditše Morena -- Gomme Samuele a buša Baisiraele a le gona moo Mitsipa.
7Eitše ge Bafilisita ba ekwa gore Baisiraele ba bokane Mitsipa, dikgošana tša Bafilisita tša tšwela Baisiraele dira. Baisiraele ge ba di kwa, ba tšhoga Bafilisita. 8Ba botša Samuele ba re: O se ke wa kgaotša go re rapelela go Morena Modimo wa rena, gore a re namolele diatleng tša Bafilisita. 9Samuele a tšea kwanyana e sa anywago, a e dira sehlabelo setšhungwamoka, a rapela Morena ka baka la Isiraele; gomme Morena a mo kwa. 10Ya re ge Samuele a sa fihliša sehlabelo seo, ke ge Bafilisita ba batamela ba hlabana le Baisiraele. Gomme Morena a dumiša maru ka modumo o mogolo godimo ga Bafilisita mohla woo; a ba raranya mme ba fenywa ke Baisiraele. 11Banna ba Baisiraele ba ba šwahlela ba etšwa Mitsipa, ba rakediša Bafilisita, ba ba bolaya ba ba gomela Bethe-Kara.
12Samuele a tšea leswika a le tsema mo gare ga Mitsipa le Sene, a le reela leina a re ke Ebenesere, a re: Morena o re thušitše a re fihliša mo. 13Bafilisita ba loba, ba se ke ba hlwa ba etla mellwaneng ya Isiraele, ka gobane seatla sa Morena se be se elwa le Bafilisita mehleng yeo ka moka ya ge Samuele a le gona. 14Gomme metse ka moka ye Bafilisita ba bego ba e amogile Baisiraele, go tloga ka Ekironi go fihla ka Gathe, ya boela go Baisiraele, ba e amoga Bafilisita ka maatla. Le gona mehleng yeo Baamoro ba be ba sa lwe le Baisiraele.
15Gomme Samuele lebaka ka moka la bophelo bja gagwe o be a ahlolela Isiraele. 16Ka ngwaga o mongwe le o mongwe o be a thetha le motse wa Bethele, le wa Giligala, le wa Mitsipa; gomme a ahlolela Isiraele a le metseng yeo. 17A fela a boela Rama, ka gobane e be e le gona ga gabo; a ahlolela Isiraele a le ntshe. Gona moo o be a agetše Morena aletare.
