1 SAMUELE 3

₁Lesogana lela, Samuele, o be a hlankela Morena a lebeletšwe ke Eli. Mehleng yeo lentšu la Modimo le be le hlokwa, go se na pono e tšwelelago. ₂Eitše ka tšatši le lengwe, ge Eli a robetše dilaong tša gagwe, mahlo a gagwe a šetše a thomile go pompala, a sa hlwe a kgona go bona, ₃lebone la Modimo le sešo la tima, Samuele yena a robetše mo Ngwakong wa Morena, mo go bego go le polokelo ya Modimo, ₄Morena a bitša Samuele. Samuele a re: Ke nna e! ₅A akgofa a ya go Eli, a re: Ke nna e; ke kwa o mpitša.

Eli a re: Ga nka ka go bitša; boela dilaong. Samuele a boela dilaong.

₆Morena a boeletša a mmitša a re: Samuele! Samuele a tsoga a ya go Eli a re: Ke nna e; ke kwa o mpitša. Eli a re: Ga nka ka go bitša, ngwanaka; boela dilaong. Samuele a boela dilaong.

₇Gomme Samuele o be a sešo a tseba Morena; o be a sešo a utollelwa lentšu la Morena.

₈Morena a boela a bitša Samuele la boraro; a tsoga a ya go Eli a re: Ke nna e; ke kwa o mpitša.

Ya ba mo Eli a lemogago ge lesogana leo le bitšwa ke Morena. ₉A botša Samuele a re: Boela dilaong. E re ge o bitšwa, o arabe o re: Morena, bolela; mohlanka wa gago o theeditše. Gomme Samuele a boela dilaong tša gagwe.

₁₀Morena a tla a ema a bitša Samuele bjalo ka mankgapele, a re: Samuele! Samuele!

Samuele a re: Bolela; mohlanka wa gago o theeditše.

₁₁Morena a bolela le Samuele a re: Tseba gore mo go Isiraele ke tlo dira dilo, tše motho a di kwago, a tlo tsirinyega tsebe ka dipedi. ₁₂Mohla woo ke tlo tsošetša Eli tšohle tše ke boletšego leloko la gagwe ka tšona, ka di thoma, ke be ke di phethe. ₁₃Ke mmoditše ka re leloko la gagwe ke tlo le lahla ya ba moka, ka baka la bokgopo bjo a bego a bo tseba, ge barwa ba gagwe ba ikgoboša, mme a se ba kgaleme. ₁₄Ka ba ka enela leloko la Eli ka re: Bokgopo bja leloko la Eli bo ka se ke bja ba bja hlatsiwa ka sedimo le ge e le sebego neng le neng.

₁₅Samuele a robala go fihla ge go esa, a bula mojako wa Ngwako wa Morena. Fela, a boifa go botša Eli tša pono yeo. ₁₆Eli a ba a mmitša a re: Samuele, ngwanaka!

Samuele a re: Ke nna e!

₁₇Eli a re: O boditšwe taba mang? Hle o se mphihlele selo. Modimo a go dire ka gore le ka gore ge o ka mphihlela le setee sa tše o boditšwego tšona.

₁₈Ke mo Samuele a mo anegetšego ditaba ka moka, a se mo fihlele selo. Eli a napa a re: Ke Morena; a a dire tše a bonago e le botse.

₁₉Ge e le Samuele, yena a gola. Morena a ema le yena; gwa se be le lentšu letee la gagwe le Morena a le hlokišitšego go phethega. ₂₀Le Baisiraele ka moka go tloga ka Dani go fihla Bereseba ba lemoga ge Samuele e le moporofeta wa makgonthe wa Morena. ₂₁Gomme Morena a fela a bonala gona moo Silo, a ikutolla go Samuele ka go mo kweša lentšu la Morena gona moo Silo.