1 SAMUELE 29

₁Bafilisita ba be ba bokanya madira a bona ka moka motseng wa Afeke. Baisiraele mešaša ya bona e be e le sedibeng sa kua Jeseriele. ₂Dikgošana tša Bafilisita tša tla le dikgao tša ba makgolo le tša ba dikete. Le Dafida a tla a na le banna ba gagwe, a šetše Akise nthago. ₃Dikgošana tša Bafilisita tša re: Bahebere ba ba nyakang fa?

Akise a re: Naa ga se Dafida mohlanka yola wa Saulo kgoši ya Isiraele, e a feditšego matšatši le nywaga a na le nna? Gomme yena, e sa le mola a hlanogetše ba gabo, ga ke ešo ka ba ka hwetša a na le taba, le nankhono.

₄Dikgošana tša Bafilisita tša mo omanya tša re: Gomiša monna e; a a boele felo mo o bego o mmeile gona. A se ke a tšwela le rena tlhabanong, a se tlo re šatogela. Se a kago thabiša mong wa gagwe yola ka sona e ka bang, ge e se dihlogo tša banna bano! ₅Naa ga se yena Dafida yola yo ba bego ba mo tlotla ba re: Saulo o hlaba ba gagwe ba sekete. Dafida ba gagwe ke kete tše lesome?

₆Akise a bitša Dafida a bolela le yena a re: Ka bophelo bja Morena, wena o lokile; gomme nna ke be ke re ke bothakga ge o etšwa dira le nna. E sa le mola o etla go nna, ga ke ešo ka ba ka bona bokgopo go wena; o gerulwa ke dikgošana tše. ₇Bjale goma, o boele gae o rotše pelo, gore o se dire se se kago rona dikgošana tša Bafilisita.

₈Dafida a fetola a re: Ke sentšeng? E sa le mola ke etla go wena, le lehono le, o boneng go nna mohlanka wa gago, ge go thwe ke se ke ka tšwa ka hlabana le manaba a gago, Kgoši Mongaka?

₉Akise a fetola a re: Nna ke tseba ge o le sethakga; ke bile ke go sema morongwa wa Modimo. Fela, dikgošana tša Bafilisita di itše: O se ke wa tšwela tlhabanong le rena. ₁₀Bjale o tsoge e sa le bošego, le bahlanka ba mong wa gago, ba o tlilego nabo. Gomme ge le tlemile e sa le bošego, le re ge go esa le wele tsela.

₁₁Dafida a tsoga e sa le bošego a na le banna ba gagwe; gomme ka matlagosa a boela nageng ya Bafilisita. Bafilisita bona ba tšwa ba leba Jeseriele.