1 PETRO 4

₁Bjalo ka ge Kriste a hlokofaditšwe mmele ka baka la rena, le lena itlhameng ka kgopolo e etšago yeo, ya go re: e a hlokofatšwago mmele o hlobogana le dibe, ₂gore ge le sa šaletšwe ke lebaka la go phela nameng, le se hlwe le phelela dikganyogo tša batho, le phelele thato ya Modimo. ₃Gobane ga go sa nyakwa tša mehla ye e fetilego, tša ge re sa dira tše di ratwago ke bantle tša go keka le maipshino le dikganyogo le botagwa le bohori le go nwa, le mekgwa ye e ronago ya go direla medimo e šele. ₄Ke sona se se ba tlabago, ge le sa etše bona la kitimela moo ba itahlelago bohlola, mme ba le goboša. ₅Bona ba tlo iphetolela ba lebane le eo a tlogo sekiša ba ba phelago le ba ba hwilego. ₆Ge bahu ba boditšwe Ebangedi, ke go re ka thoko ya motho wa nama ba solwe, mme ba phele moyeng ka thato ya Modimo.

₇Bofelo bja dilo tšohle bo batametše. Bang le kelelo le phakgamele dithapelo. ₈Se segolothata le be le leratano le tletšego, gobane lerato le bipa dikarogo tšohle. ₉Le be ba go thabelana le baeng; go se be le go ngongorega. ₁₀Le direlane ka mo e mongwe le e mongwe a seditšwego ka gona ka go gaugelwa; le be balaki ba botse ba dikabelo tša mehutahuta tša kgaugelo ya Modimo. ₁₁Ge e mongwe e le wa go bolela, a ye ka dithuto tša Modimo; ge e mongwe e le wa go direla, a dire ka mo Modimo a mo neilego ka gona; e be gore dilong tšohle go tumišwe Modimo ka Jesu Kriste, mong wa letago le maatla go iša mehleng ya neng le neng. Amene.

₁₂Barategi, le se ke la tlabja ke phišo ye e le wetšego gore le lekwe ka yona; e se ke ya le tlaba boka selo se le sa se tsebego. ₁₃Sa lena a e be go thaba ge le lena le eba batee le Kriste ka go tlaišwa, gore mohla letago la gagwe le bonalago, le tle le thabe le hlalale. ₁₄Ge le gobošwa ka baka la leina la Kriste, gona le ba lehlogonolo, gobane ke gona le okametšwe ke Moya wa letago le maatla, Moya wa Modimo, wo bona ba o gobošago, wo lena le o retago. ₁₅Mo go lena go se ke gwa ba le e a hlokofatšwago e le mmolai goba lehodu, goba sesenyi goba sehwirihwiri. ₁₆Ge motho a ka hlokofatšwa ka gore e le Mokriste, a se ke a kwa dihlong; a a retiše Modimo ka lona ina leo.

₁₇Gobane lebaka la gore kahlolo e thome ka Ngwako wa Modimo le fihlile. Bjalo ge e thoma ka rena, pheletšo ya ba ba ganago go kwa Ebangedi ya Modimo e tlo ba eng? ₁₈Ge wa moloki a tlo phologa ka thata, monyatši wa Modimo le modirabobe ba tlo leba kae? ₁₉Ke gona ba ba hlokofatšwago ge go iwa ka thato ya Modimo, a ba gafele meoya ya bona yena Mmopi Mmotegi, ba fela ba dira gabotse.