1 DIKGOŠI 7

₁Ge e le ngwako wa gagwe Salomo o o agile ka nywaga e lesome le metšo e meraro, ya ba gona a o fetšago. ₂A aga le ngwako wa Sekgwa sa Libanoni. Go nama ga wona e be e le meelo e lekgolo, bophara e be e le meelo e masome a mahlano, leemo e be e le meelo e masome a mararo. A lokologanya methaladi e mene ya dikokwane, a rapalega ka dikota tša morokwana godimo ga tšona. ₃Hlaka e be e le ya mamati a morokwana, e ruletše nywakwana e bego e rwelwe ke dikokwane e le lesome le e mehlano ya tlase, le lesome le metšo e mehlano ya godimo ga yona, le lesome la metšo e mehlano ya godimodimo, ka moka e le nywakwana e masome a mane a metšo e mahlano. ₄Go be go na le methaladi e mehlano ya maroba a a hlatlaganego e le a mararo a mararo. ₅Mejako ka moka e be e le ya dikhutlo tše nne, e na le dijakwane; le maroba a be a le ka mokgwa woo a hlatlagane e le a mararo a mararo.

₆A aga ngwako wa dikokwane; botelele bja wona e be e le meelo e masome a mahlano; bophara e be e le meelo e masome a mararo; a bea mathudi pele ga wona, a nago le dikokwane le direpodi.

₇A aga le ngwako wa sedulo sa kahlolo, ngwako wa kahlolo; o be a o manegile ka mamati a morokwana go tloga lebatong go fihla hlakeng.

₈A aga le ngwako wa gagwe wo a bego a dula go wona; o be o le ka lapeng la kua morago, ge motho a fetile ngwako wa kahlolo; le wona a o aga ka mokgwa woo. Le morwedi wa Farao yo Salomo a bego a mo tšere, o mo agetše ngwako ka mokgwa woo.

₉Nywako ye ka moka e be e agilwe ka maswika a mabotse, a a betlilwego, a a segilwego ka disaga thoko tšohle; a be a agile go tloga motheong go fihla hlakeng, a kgotlagana le lapa le legolo. ₁₀Motheo o be o agilwe ka matlapa a a betlilwego, a magolo, a meelo e lesome le a meelo e seswai. ₁₁Maboto e be e le maswika a mabotse a a betlilwego ka tekanyo ya ona, le a mamati a morokwana. ₁₂Lapa le legolo le be le ageletšwe ke morako wa methaladi e meraro ya maswika a a betlilwego, le mothaladi o tee wa dikota tša morokwana, ka mokgwa wola wa morako wa lapeng la ka gare la ngwakong wa Morena; le lapeng la ngwako wa mathudi go be go ageletšwe ka mokgwa woo.

₁₃Gomme kgoši Salomo a roma motseta a yo bitša Hirama kua motseng wa Tiro. ₁₄E be e le ngwana wa mosadi wa mohlologadi wa leloko la Nafutali; tatagwe e be e le monna wa Tiro. E be e le morudi wa mphiri monna yo bohlale le tsebo, maitse medirong ya mehutahuta ya mphiri. O tlile go Salomo a mo direla mediro ya gagwe.

₁₅A dira dikokwane tše pedi ka mphiri. Botelele bja dikokwane tšeo e be e le meelo e lesome le metšo e seswai; bokoto bja tšona e be e le meelo e lesome le metšo e mebedi. ₁₆A di direla dihlogo tša mphiri o tšholotšwego, a di bea dintlheng tša tšona; hlogo e tee e be e na le meelo e mehlano. ₁₇Dihlogo tša fapiwa ka se e kego ke lokwa le le logilwego ka metato; hlogo ka e tee ya fapiwa ka malokwa a šupago. ₁₈A dira dikgokolo tše e kego ke marapa, a di kgokela lokweng, tša dikologa dihlogo tša dikokwane e le methaladi e mebedi.

₁₉Lebopo la hlogo tša dikokwane tše e be e le la letšoba la meelo e mene bogolo; gomme di be di emišitšwe pele ga mathudi. ₂₀Dikgokolo tše di etšago marapa, di rarilego dihlogo tša dikokwane ka mathokong a tšona, e be e le tše makgolo a mabedi.

₂₁Dikokwane tše tša emišwa pele ga mojako wa Ntlokgethwa; ya ka thoko ya le letona ba re ke Jakini (o tiišitše); ya ka thoko ya la ntsogošo ba re ke Boase (maatla). ₂₂Dihlogo tše di etšago matšoba tša bewa godimo dintlheng tša tšona.

Modiro wa dikokwane wa phethega ka mokgwa woo.

₂₃A dira le mogopo o mogolo wa mphiri o tšholotšwego; mogopo woo ge o elwa go tloga morumong go iša morumong e be e le meelo e lesome; leemo e be e le meelo e mehlano; ge go elwa tikologo ya wona, e be e le meelo e masome a mararo. ₂₄Ka tlase ga morumo wa wona go be go na le diswantšho tša maraka di dikologile mogopo mo go fela, e le methaladi e mebedi, e le tshipi e tee le mogopo ge e thšollwa. ₂₅Mogopo wo o be o rwelwe ke diswantšho tša dipholo tše lesome le metšo e mebedi, tše tharo di lebile leboa, tše tharo tša leba bodikela, tše tharo tša leba borwa, tše tharo tša leba bohlabela; di be di išitše dinoka ka gare di rwele mogopo woo. ₂₆Bokoto bja mphiri ya wona bo be bo lekana le bophara bja seatla; morumo wa wona o ne o etša wa lefišwana, o le bjalo ka letšoba. Mogopo woo o be o tlala ge o tšhetšwe meetse a meeta e dikete tše pedi.

₂₇A dira le dikoloinyana tše lesome ka mphiri. Botelele le bophara bja koloi e be e le meelo e mene, leemo meelo e meraro. ₂₈Di be di dirilwe ka mokgwa wo: Di be di na le mamati a mahlakore, a a swaraganego ka a mangwe ka gare. ₂₉Ka mahlakoreng a go be go na le diswantšho tša ditau, le tša dikgomo le tša Bakerubi. Ka godimo ga diswantšho tše le ka tlase ga tšona go be go beilwe malepelepe a a logilwego. ₃₀Koloinyana e be e na le maotwana a mane a mphiri; le bohlomelo bja ona e be e le mphiri. Ka dikhutlong tše nne go be go na le madulo a go bea megopo ya go hlapela; a be a tšholotšwe a na le lebopo la sehlaga. ₃₁Mogopo o be o rarilwe ke sekasehlaga se leemo la moelo o tee le seripa, se na le diswantšho mahlakoreng, se eme ka leoto la dikhutlo tše nne. ₃₂Maotwana a mane a koloinyana a be a hlomelwa ka tlase ga mahlakore, ka tlase ga bobeo bja megopo. Leemo la leotwana e be e le moelo o tee le seripa. ₃₃Maotwana a be a dirilwe bjalo ka maotwana a koloi; bohlomelo bja ona, le pelo ya ona, le dithabe tša ona, le merumo ya ona, e be e le mphiri o tšholotšwego. ₃₄Dikhutlong tše nne ke mo go bego go na le bobeo bjola bja dihlapelo, e le tshipi e tee le ya koloi. ₃₅Mo gare ga koloi go be go thekgilwe bobeo bja nkgo ya meetse, bo tlotlometše bja dira seripa sa moelo, bo swaragane le bobeo bja megopo, e le tshipi e tee. ₃₆Mahlakore a bobeo bjo a be a na le diswantšho tša Bakerubi, le tša dihlare tša melala, le tša ditau, gwa se be le sebaka se se hlokago seswantšho. ₃₇Dikoloi tšeo tše lesome ka moka di be di dirilwe ka mokgwa woo; di tšholotšwe e le tshipi e tee; gomme di be di swana ka tekanyo le ka lebopo la tšona.

₃₈A dira le dinkgo tša meetse a go hlapa tše lesome, tša tshipi ya mphiri. E tee ya tšona e be e tlala ge e tšhetšwe meetse a meeta e masome a mane. Dinkgo tše tša bewa bobeong bja tšona; koloinyana e nngwe le e nngwe ya rwala nkgo ya yona. ₃₉Dikoloinyana tše tlhano a di bea lehlakoreng la Ngwako le lebago thoko ya borwa; tše tlhano a di bea lehlakoreng la Ngwako le lebago leboa. Mogopo wola o mogolo o o beile ka thoko ya bohlabela bolebaborwa.

₄₀Hirama o dirile le megopo ya go hlapela, le digo, le meruswi; a ba a phetha mediro ka moka ya Ngwako wa Morena ye a e diretšego Salomo. ₄₁Ke dikokwane tšela tše pedi, le dihlogo tša tšona, le malokwa a mabedi a go di apeša, ₄₂le dikgokolo tšela tše makgolo a mane tša go swantšha marapa tša go kgokelwa ya ba methaladi e mebedi mo lokweng la go apeša hlogo ya kokwane; ₄₃le dikoloinyana tšela tše lesome, le dinkgo tša tšona tše lesome tša go dula mo go tšona. ₄₄Le mogopo o mogolo wola wo o bego o rwelwe ke dipholo tše lesome le metšo e mebedi; ₄₅le dipitša, le digo, le meruswi.

Ke tšona dibja tše Hirama a di diretšego kgoši Salomo ka mphiri wo o ritetšwego, ya ba tša Ngwako wa Morena. ₄₆Kgoši e di dirile ka kua lešing la noka ya Jorodane, mo go lego letšibogo la ka gare ga Sukothe le Tsarathane. ₄₇Mphiri wo o dirilego dibja tše ka moka, Salomo ga a ka a o ela, ka gobane e be e le o montši ka kudu; boima bja mphiri woo bo be bo sa lekanywe.

₄₈Gomme Salomo o dirile le dilo tše dingwe tša Ngwako wa Morena, e lego aletare ya gauta, le sethalana sa gauta sa go bewa magobeaponwa, ₄₉le dihlomapone tše tlhano tša go bewa lehlakoreng la go le letona, le tše tlhano tša go bewa lehlakoreng la go le letona, le tše tlhano tša go bewa lehlakoreng la go la ntsogošo mo pele ga sekgethwakgethwa, e le tša gautatshekegi, di na le matšoba le dipone, le matlao a tšona a gauta. ₅₀Le megopo, le dihlaba, le mabeana a diorelo, ka moka di dirilwe ka gautatshekegi. Le metswiri ya mejako, ya mojako wa sekgethwakgethweng, le ya mojoka ya Ngwako o mokgethwa o mogolo e be e le ya gauta.

₅₁Mohla ba phethilego mediro ka moka ye kgoši Salomo a e diretšego Ngwako wa Morena, Salomo o hlaotše dilo tšohle tše Dafida tatagwe a di kgethetšego Morena, disilifera le digauta le dilo tše dingwe, a di tliša a di bea mo dipolokelong tša Ngwakong wa Morena.