1 DIKGOŠI 5

₁Le Hirama kgoši ya Tiro a roma batseta ba gagwe ba tla go Salomo. Gobane o be a kwele ge ba mo tloditše a ba kgoši legatong la tatagwe; ka gobane o be a rata Dafida ka mehla. ₂Salomo a iša lentšu go Hirama a re: ₃Le wena o a di tseba, ge Dafida tate a sa ka a kgona go agela leina la Morena Modimo wa gagwe ngwako, ka baka la dintwa tše ba bego ba mo dikile ka tšona, go fihla ge Morena a ba bea ka tlase ga dinao tša gagwe. ₄Bjale nna, Morena Modimo wa ka o mphile khutšo thoko tšohle; ga go sa le lenaba, ga go sa na se se boifišago. ₅Ke gona ke ratago go agela Morena Modimo wa ka Ngwako wo Morena a o boletšego, a botša Dafida tate a re: Morwa wa gago yo ke tlogo mmea sedulong sa gago legatong la gago, ke yena a tlogo agela leina la ka Ngwako. ₆A nke o laele hle gore ba nthemele dikota tša morokwana dithabeng tša Libanoni. Bahlanka ba ka ba tlo dirišana le bahlanka ba gago; mme nna ke tlo go ntšhetša meputso ya bahlanka ba gago ka mo o tlogo bolela ka gona; ka gobane o a tseba, mo go rena ga go motho e a tsebago go rema dihlare a etša Basidone.

₇Hirama a re go kwa ge Salomo a realo, a thaba gagolo, a re: Lehono Morena a a lebogwe ge a file Dafida morwa yo bohlale bja go buša setšhaba se segolo seo. ₈A iša lentšu go Salomo a re: Lentšu le o nthometšego lona ke le kwele. Ke tlo dira se o se ratago, ka go remela dihlare tša morokana le tša megobogobo. ₉Bahlanka ba ka ba tlo di ntšha dithabeng tša Libanoni, ba di fološa ba di tliša lewatleng. Mo lewatleng di tlo tlemaganywa tša ruthišwa, tša išwa mo o tlogo ntaela gona, mo wene o tlogo tla wa di tšea. Se wene o tlogo se dira wa thabiša nna, ke go tliša dijo motseng wa ka.

₁₀Ke moka Hirama a nea Salomo dihlare tša morokwana le tša megobogobo, ka mo a ratago ka gona. ₁₁Salomo a nea Hirama dikgetsi tša mabele tše dikete tše masome a mabedi, le meeta e dikete tše masome a mabedi tša makhura a mehlware; a di ntšha ka ngwaga o mongwe le o mongwe.

₁₂Gomme Morena a fa Salomo bohlale ka mo a mmoditšego, Salomo le Hirama ba ba le leago, ba ba ba dira kgwerano.

₁₃Go Isiraele ka moka kgoši ya ntšha sepalo. Batho ba sepalo ya ba banna ba dikete tše masome a mararo. ₁₄A ba roma ba ya dithabeng tša Libanoni ka go šielana sebaka ka ba dikete tše lesome. Ba ya ba fetša kgwedi e tee ba le dithabeng tša Libanoni, ba boa ba fetša dikgwedi tše pedi ba le magaeng. Mohlapetši wa ba dipalo e be e le Adonrirama. ₁₅Le gona Salomo o be a na le banna ba dikete tše masome a šupago ba go rwala dikago, le babetli ba maswika dithabeng ba dikete tše masome a seswai, ₁₆go sa balwe bahlapetši ba dikete tše tharo le makgolo a mararo, ba Salomo a bego a ba beile gore ba hlapetše badiri ba mediro. ₁₇Kgoši e be e laetše gore go tlišwe maswika a magolo a boima, gore motheo wa Ngwako o agiwe ka maswika a a betlilwego. ₁₈Gomme baagi ba Salomo, le baagi ba Hirama, le ba Gebala, ba betla dikota le maswika a go aga ngwako.