Dafida o a laela. Salomo o buša ka bogale
1Ge go šetše go batamela lebaka la go hwa ga Dafida, a laela Salomo morwa wa gagwe a re: 2Nna bjale ke ya ka tsela ya bohle ba lefase. Tiiša maatla, o eme senna. 3O hlokomele tše Morena Modimo wa gago a ratago gore di hlokomelwe; o sware tsela ya gagwe, le ditaelo tša gagwe, le melao ya gagwe, le mabohlatse a gagwe ka mo a ngwadilwego mo melaong ya Moshe, gore o letlege go tšohle tše o di dirago, le gohle mo o lebago ntshe, 4gore Morena a phethe se a mpoletšego ka sona a re: Ge bana ba gago ba ka itota ditseleng tša bona, ba phela ka go mpotegela ka dipelo tša bona ka moka le ka meoya ya bona ka moka, gona o ka se ke wa hlokišwa monna e a tlogo dula sedulong sa Isiraele.
5Le gona, se Joaba morwa wa Tseruya a ntirilego sona o a se tseba, le se a se dirilego balaodi ba babedi ba madira a Isiraele; ke ra Abenere morwa wa Nere, le Amasa morwa wa Jethere, bao a ba bolailego, a lefetša madi a ntweng lebakeng la ge go iketlilwe, a ikgaša ka madi a ntwa moketwaneng o bego o le lethekeng la gagwe, le dieteng di bego di le naong tša gagwe. 6O dire ka bohlale bja gago gore hlogo e pududu ya gagwe e se ke ya ya bodulabahu a sešo a lefetšwa.
7Ge e le barwa ba Barasilai monna ela wa Gileada, o ba dire ka botho, ba dule le ba ba jago tša meruswi ya gago; ka gobane ke bona ba ba kilego ba tla go nna mola ke tšhaba Abesalomo ngwaneno.
8Gomme le Simei morwa wa Gera wa ga Benyamini wa Bahurimi o sa le fa hleng ga gago; yena o kile a nthoga ka maroga a mašoro mohla wola ke eya Mahanaime; fela, a upa a tla a ntlhakanetša nokeng ya Jorodane, ka mo enela ka re: Nka se ke ka go bolaya ka lerumo. 9Bjale wena o se ke wa re ga a na molato. O monna yo bohlale; o tlo tseba se o tlogo mo dira sona, gore hlogo e pududu ya gagwe e fologele bodulabahu e na le madi.
10Gomme Dafida a yo ithobalela le botatagwe, a bolokwa motseng wa Dafida. 11Lebaka le Dafida a bušitšego Isiraele ke nywaga e masome a mane. A le Heburone o feditše nywaga e šupago; nywaga e masome a mararo le metšo e meraro o e feditše a le Jerusalema. 12Gomme Salomo a dula sedulong sa Dafida tatagwe; mme bogoši bja gagwe bja tla ka maatla.
13Adonia morwa wa Hagithi o kile a tla go Batseba mmago Salomo; Batseba a re: A o tla ka khutšo?
A fetola a re: Ke ka khutšo! 14Adonia a re: Ke na le taba ya go bolela nago.
Batseba a re: Bolela!
15Adonia a re: O a di tseba gobane bogoši bo be bo šetše bo swerwe ke nna. Baisiraele ka moka ba be ba lebeletše nna gore ke be kgoši. Fela, bogoši bo ntlogile ya ba bja monnake, ka gobane o bo neilwe ke Morena. 16Bjale ke na le kgopelo e tee fela ye ke e tlišago go wena; a ke o se nkgerule. Batseba a re: Bolela!
17Adonia a re: A ko bolele le kgoši Salomo, -- gobane wena a ka se ke a go gerula, -- O re a nnee Abisaga wa Sunema e be mosadi wa ka.
18Batseba a re: Go lokile; ke tlo go bolelela go kgoši.
19Batseba a tsena go kgoši Salomo gore a bolele le yena ka baka la Adonia. Kgoši ya tsoga ya mo hlakanetša ya lotšha ya tsebo boela sedulong sa yona. Salomo a laela gore mmagwe a beelwe sedulo. Batseba a dula ka letsogong le letona la kgoši. 20Bjale Batseba a re: Ke na le tabanyana e tee ye ke e kgopelago go wena; a o se ke wa nkgana.
Kgoši ya re: Kgopela hle, Mma! Nka se ke ka go gana.
21Batseba a re: Abisaga wa Sunema a a neelwe Adonia mogoloago, e be mosadi wa gagwe.
22Kgoši Salomo a fetola a bolela le mmagwe a re: O reng o kgopela gore Abisaga wa Sunema e be wa Adonia? Gona napo mo kgopelele le bogoši; gobane ke mogoloake, gomme Abyathara moperisita le Joaba morwa wa Tseruya ba ema nae. 23Gomme kgoši Salomo a ena ka Morena a re: Modimo a ka ntira ka gore le ka gore, ge taba ye e bolelwago ke Adonia e sa mo iše lehung. 24Bjale, ka bophelo bja Morena e a mpeilego a ntudiša sedulong sa Dafida tate, ka yena e a nkagetšego ngwako ka mo a boletšego, Adonia lehono o tlo bolawa.
25Salomo kgoši a napa a roma Benaya morwa wa Joyada, a ya a mmolaya a hwa.
26Ya ba gona kgoši e laetšego Abyathara ya re: Sepela, o ye Anathothe mo go lego tšhemo ya gago. Se se go swanetšego ke go bolawa. Fela, nka se ke ka go bolaya lehono, gobane ke wena o bego o rwala polokelo ya Morena o eta Dafida tate pele, wa hlaka ka tšohle tše Dafida tate a kilego a hlaka ka tšona. 27Ya ba gona go leleka Abyathara a kgaotša go ba moperisita wa Morena; gwa phethega lentšu le Morena a boletšego leloko la Eli ka lona kua Silo.
28Taba ye ya fihlela Joaba. Joaba o be a ema le Adonia, le ge a sa ka a ema le Abesalomo. Bjale Joaba a tšhabela Ngwakong wa Morena, a itshwarelela ka dinaka tša aletare. 29Kgoši Salomo a tsebišwa gore Joaba o tšhabetše Ngwakong wa Morena; šola o eme aletareng. Salomo a roma Benaya a re: Yaa o mmolaye! 30Benaya ge a tla Ngwakong wa Morena, a botša Joaba a re: Kgoši e re: Tšwaa fao.
Joaba a re: Aowa, ke hwela fa! Benaya a boela go kgoši a re: Joaba o fetotše ka go re le ka go re!
31Gomme kgoši ya laela Benaya ya re: Dira ka mo a boletšego ka gona, o mmolaye, o mmoloke, gore nna le leloko lešo re tlogwe ke madi a se nago molato a tsholotšwego ke Joaba. 32Morena o mmušeletša madi a a tšholotšwego ke yena, ka gobane o bolaile banna ba babedi, ba ba bego ba mo phala ka go loka; ke Abenere morwa wa Nere molaodi wa dira tša Isiraele, le Amasa morwa wa Jethere molaodi wa dira tša Juda. O ba bolaile ka lerumo, Dafida tate a sa tsebe fao. 33Madi a bona bao a a bušetšwe hlogong ya Joaba le ya peu ya gagwe neng le neng; gomme khutšo e tšwago go Morena e tlele Dafida, le peu ya gagwe, le leloko la gagwe, le sedulo sa gagwe neng le neng.
34Benaya morwa wa Joyada a ya a mmolaya a hwa; a bolokwa ngwakong wa gagwe lešokeng. 35Legatong la gagwe kgoši ya bea Benaya morwa wa Joyada a ba molaodi wa madira; Tsadoko moperisita kgoši ya mmea legatong la Abyathara.
36Gomme kgoši ya roma motseta ya bitša Simei, ya mmotša ya re: Ikagele ngwako fa Jerusalema, o dule go wona; o se ke wa ba wa tšwa wa ya mo gongwe. 37Mohla o kago tšwa wa sela noka ya Kidirone, o tsebe gore o tlo bolawa; gomme molato e tlo ba e le wa gago.
38Simei a fetola a re: O boletše gabotse; nna mohlanka wa gago ke tlo dira ka mo mong wa ka a boletšego ka gona. Gomme Simei a tla a dula Jerusalema galelele.
39Gwa feta nywaga e meraro. Bahlanka ba babedi ba Simei ba tšhaba ba ya go Akise morwa wa Maaka Kgoši ya Gathe. Simei a tsebišwa gore bahlanka ba gagwe ba kua Gathe. 40Simei a tsoga, a tlema pokolo ya gagwe, a ya Gathe go Akise, a nyaka bahlanka ba gagwe; a boa nabo a etšwa Gathe. 41Gomme Salomo a botšwa gore Simei o be a tšwele Jerusalema a ya Gathe; o bile o boile. 42Ke mo kgoši e romilego motseta a bitša Simei, ya mo rera ya re: A ga nka ka go eniša ka Morena ka go tiišetša ka re: Mohla o tšwago wa ya mo gongwe, o tsebe gobane o tlo bolawa? Wa ba wa fetola wa re: Lentšu la gago ke le kwele, o boletše gabotse. 43Ke ka baka lang ge o sentše keno ya Morena, wa nyatša taelo ye ke go laetšego yona? 44Gomme kgoši ya re: Bobe ka moka bjo o bo dirilego tate Dafida o a bo tseba; le pelo ya gago e a bo tseba. Bjale bobe bjoo ka moka Morena o bo bušetša mo hlogong ya gago. 45Gomme kgoši Salomo o a atlega, sedulo sa Dafida se tlo tia se le pele ga Morena neng le neng.
46Kgoši ya laela Benaya morwa wa Joyada, a ya a mmolaya a hwa mmošo wa tia o le seatleng sa Salomo.
