1 DIKGOŠI 10

₁Kgoši ya Seba e bego e le mosadi, o kile a kwa tumo ya Salomo gotee le leina la Morena, a tla go leka Salomo ka merero. ₂A fihla Jerusalema a na le bahlanka ba bantši, le dikamela tše di welego dinoko, le digauta, le dipheta tše bohlokwa; a tla go Salomo a bolela nae taba tšohle tša pelong ya gagwe. ₃Salomo a mo hlathollela ditaba tša gagwe ka moka, gwa se be le taba e tee e utagetšego kgoši, ye a sa kago a mo hlathollela yona. ₄Ya re ge mohumagadi kgoši ya Seba a bona bohlale bja Salomo ka moka, le Ngwako wo a o agilego, ₅le dijo tša mo meruswing ya gagwe, le didulo tša dikala tša gagwe, le ka mo bahlanka ba gagwe ba bego ba mo hlankela ka gona, le diaparo tša bona, le batšheledi ba gagwe, le dihlabelo tše a bego a di iša Ngwakong wa Morena, a felelwa ke mogopolo, ₆a bolela le kgoši a re: Tše ke di kwelego ke le kua nageng ya gešo, ge go bolelwa wena le bohlale bja gago, ke therešo. ₇Ke be ke sa kgolwe tše ba mpoditšego tšona, ka ba ka di bona ka mahlo aka; bjale šedi, tše ba mpoditšego tšona ke seripa fela. Bohlale bja gago le botse bja gago di fetiša tumo ye ke e kwilego. ₈Ba lehlogonolo ke batho ba gago! Ba lehlogonolo ke bahlanka ba gago ba ba go hlankelago ka mehla mme ba kwa bohlale bja gago. ₉A go retwe Morena Modimo wa gago e a go thabetšego a go dudiša sedulong sa bogoši bja Isiraele a ratile Isiraele neng le neng, a go bea kgoši gore o dire ka tshwanelo le ka toko.

₁₀A realo mme a nea kgoši gauta ya ditalente tše lekgolo le masome a mabedi, le dinoko tše ntši ka kudu, le dipheta tša bohlokwa. Ga go a ka gwa tlišwa dinoko tše di kakago tše mohumagadi wa Seba a di felego Salomo.

₁₁Le maselawatle a Hirama a bego a tliša gauta ya Ofira, a boa Ofira a tla le dikota tše ntTsi tša morekure le dipheta tša bohlokwa. ₁₂Dikota tšeo tša morekure, ke tšona tše kgoši a dirilego diphao mo Ngwakong wa Morena ka tšona, le mo ngwakong wa bogoši; tša dira le diletšo le makope a baopedi. Dihlare tše bjalo tša morekure ga tša ka tša hlwa di tlišwa tša bonwa le nankhono.

₁₃Ge e le kgoši Salomo, yena o neile mohumagadi wa Seba tše a di belaetšego a di kgopela; a mo nea dimpho tše dingwe tše di swanetšego seatla sa kgoši. Gomme mohumagadi eo a wela tsela a boela ga gabo le bahlanka ba gagwe.

₁₄Ge e le digauta tše di bego di tlišwa go Salomo ka ngwaga o tee, boima bja tšona e be e le Talente tše makgolo a selelago a masome a selelago le metšo e selelago, ₁₅go sa balwe tše di bego di tšwa go babapatši ba ba bego ba sela, le go dikgoši ka moka tša Arabia, le go balaki ba naga ya gagwe.

₁₆Kgoši Salomo o dirile le dikotse tše makgolo a mabedi ka gauta e batotšwego; e nngwe le e nngwe ya tšona a e ntšhetša gauta ya Sekele tše makgolo a selelago. ₁₇A dira le diphemo tše makgolo a mararo tša gauta e batotšwego; se sengwe le se sengwe sa tšona a se ntšhetša gauta ya diponto tše makgolo a mararo a nago le masome a mararo; a di bea mo ngwakong wa Sekgwa sa Libanoni.

₁₈Kgoši e dirile le sedulo se segolo sa bogoši ka naka tša tlou; a se manega ka gauta e tagilego. ₁₉Sedulong se go be go iwa ka manamelo a direpodi tše di selelago; bosamelo bja sona bja nthago bo be bo etša morumo wa leselo; gwa ba le mesamelo ya mabogo ka mathokong; fase go be go beilwe diswantšho tša ditau tše pedi di bapetše le sedulo ka mahlakoreng. ₂₀Mo mathokong a direpodi tše di selelago tša manamelo go be go beilwe ditau tše lesome le metšo e mebedi. Ga go mmušo o mongwe o kilego wa direlwa tše bjalo.

₂₁Dinwelo tša kgoši Salomo ka moka e be e le tša gauta; le dibja ka moka tša ngwako wa Sekgwa sa Libanoni e be e le tša gauta e tagilego; go be go se silifera mo go tšona; ka gobane silifera mehleng yeo ya Salomo e be e sa šetšwe. ₂₂Ka gobane kgoši e be e na le maselawatle a Tarasisi, a sela mawatle gotee le a Hirama, a be a fela a boa gatee ka nywaga e meraro, a tiliša gauta, le silifera, le naka tša tlou, le ditšhwene, le dikgaka.

₂₃Kgoši Salomo e be e le yena e mogolo mo go magoši a lefase ka moka ka mahuma le ka bohlale. ₂₄Ba lefase ka moka ba belaela go bona Salomo le go kwa bohlale bja gagwe bjo Modimo a bego a bo beile pelong ga gagwe. ₂₅Bohle ba tla le dibego, e lego dibja tša silifera le tša gauta, le diaparo, le marumo, le dinoko, le dipitsi, le dimeila, gwa ba bjalo ka ngwaga o mongwe le o mongwe.

₂₆Salomo a ikgobelela le dikoloi le banamedi ba dipitsi. Dikoloi, o be a na le tše sekete le makgolo a mane. Banamedi, o be a na le ba dikete tše lesome le metšo e mebedi; a ba bea mo metseng ya dikoloi le mo motseng wa mošate wa Jerusalema. ₂₇Mo motseng wa Jerusalema kgoši ya dira gore silifera ya sengwa maswika, dikota tša morokwana tša sengwa dikota tša mego ya magoleng, ka go ata ga tšona. ₂₈Dipitsi tša Salomo di be di etšwa Egipita; bareki ba kgoši ba be ba di kgobela ya ba mohlape; ba reka mohlape ka theko ya wona. ₂₉Ba tliša le dikoloi tša Egipita; e tee ya rekwa ka Sekele tše makgolo a selelago tša silifera. Pitsi e tee e be e rekwa ka Sekele tše lekgolo le masome a mahlano. Ka mokgwa o bjalo ba tla natšo ba di iša le go dikgoši tšohle tša Bahethe le tša Basiria.