1 BAKORINTHE 10

₁Bana bešo, ga ke rate ge le dula le sa tsebe ge botatawešo ka moka ba kile ba okamelwa ke leru, ka moka ba tšwa ka gare ga lewatle. ₂Ka moka ke bakolobetšwa ba Moshe ka leru leo le ka lewatle. ₃Ka moka ba lle selewa se tee sa moya. ₄Ka moka ba nwile senwewa se tee sa moya; ba nwile se se bego se etšwa leswikeng le bego le ba felegetša; mme leswika leo e be e le yena Kriste. ₅Ba bantši ba bona ga ba ka ba kgahla Modimo, ba rapalatšwa lešokeng.

₆Gomme dilo tšeo di diregile gore di re lemoše gore re lese go kganyoga tše mpe, re se etše bona ba go di kganyoga. ₇Le se ke la etša ba bangwe ba bona la hlankela modimo wa seswantšho; boka ge go ngwadilwe gwa thwe: Setšhaba sa dulela go ja le go nwa, sa tsebo ema sa bapala. ₈Le gona re se ke ra dira bootswa, ra etša ba bangwe ba bona ba nago ba dira bootswa, gwa fedišwa ba dikete tše masome a mabedi a metšo e meraro ka tšatši le tee. ₉Le gona le se ke la leka Kriste boka ba bangwe ba nago ba mo leka, ba bolawa ke dinoga. ₁₀Le gona le se ke la tsota boka ba bangwe ba bona ba nago ba tsota, ba bolawa ke Mofediši.

₁₁Tšeo ka moka di diregetše bao gore e be go lemoša; di ngwadilwe gore e be go eletša rena ba re fihletšwego ke bofelo bja mabaka.

₁₂Ke gona, e a rego ke eme, a bone gore a se ke a wa. ₁₃Ga lešo la hlohlwa ke moleko o kago pala batho. Modimo ke Mmotegi; a ka se ke a lesa la lekwa ka tše di kago le palela; gotee le moleko o tlo fela a bea sebaka sa go tlo efoga, gore le kgone go kgotlelela.

₁₄Ka baka leo, baratwa ba ka, tšhabang mediro ya medimo e šele. ₁₅Ke bolela le ba tlhaologanyo, ke re: Latišang le bone ge se ke se bolelago e le therešo. ₁₆Senwelo sa tšhegofatšo se re se šegofatšago, a ga se kopano ya madi a Kriste? Senkgwa se re se ngwathago, a ga se kopano ya mmele wa Kriste? ₁₇Senkgwa e le se tee, rena ba re lego ba bantši re ba mmele o tee; gobane senkgwa re ja se tee ka moka ga rena.

₁₈Bonang Baisiraele; ke ra bao e lego bona ka go tswalwa; ge ba eja dihlabelo, a ga se go kopana aletareng? ₁₉Ke rang ge ke realo? A ke re modimo o šele ga se selo? ₂₀Ga ke realo; se e lego taba ke didimo tše ba ntle ba di dirago ba di direla diriti tše mpe; ga ba di direle Modimo. Gomme nna ga ke rate ge le ka ba ba go kopana le diriti tše mpe. ₂₁Le ka se kgone go nwa senwelo sa Morena, la tla la nwa le senwelo sa diriti, le ka se kgone go ba ba go abelwa mogopo wa Morena, la tla la abelwa le mogopo wa diriti. ₂₂A re ka se rumole Modimo? A re ka mo phala ka maatla?

₂₃Ke dumeletšwe dilo tšohle; fela, ga se gore ka moka di a hola. Ke dumeletšwe dilo tšohle; fela, ga se gore ka moka di a agiša. ₂₄A motho a se ke a inyakela tša gagwe; a a nyake sa go hola ba bangwe.

₂₅Tšohle tše di bapatšwago mapatlelong a go reka nama, le ka di ja le sa latiše mo di tšwago; le dire bjalo ka baka la letswalo. ₂₆Ka gobane lefase ke la Morena, le tšohle tše di tletšego mo go lona.

₂₇Ge le laleditšwe ke motho wa go se dumele, mme le rata go ya, le je tšohle tše a le abelago tšona, le sa botšiše mo di tšwago, ka baka la letswalo. ₂₈Fela, ge motho a ka le botša a re: Ke nama ya sedimo! Le se ke la e ja; le lese ka baka la eo wa go le botša, le ka baka la letswalo. ₂₉Letswalo ke ra la eo e mongwe, e sego la gago; gobane o tlo ba o direlang ge o fo itshodišwa bolokologi ke letswalo la e mongwe? ₃₀Ge nna nka ja ke leboga, ke tlo ba ke direlang ge ke ithogiša ka tše ke di lebogago?

₃₁Ke gona ge le eja, ge le enwa, tšohle tše le di dirago le di dire gore Modimo a retwe ka tšona. ₃₂Le se ke la ba ba go kgopiša Bajuda le ge e le Bagerika le ge e le phuthego ya Modimo, ₃₃bjalo ka ge nna ke kgahliša batho bohle dilong ka moka ke sa nyake se se holago nna, ke nyaka se se holago ba bantši, gore ba phologe.