1 KORONIKA 5

₁Bana ba Rubeni morwa wa ntlha wa Isiraele -- gobane e be e le yena wa pele; fela, o gobošitše malao a tatagwe, mme bogolwane bja gagwe bja newa barwa ba Josefa morwa wa Isiraele, le ge mo tokologanyong ya moloko a sa ka a fiwa bogolwane; ₂gobane e a bego a feta bana babo ka moka e be e le Juda; go yena gwa tšwa kgoši ya bona. Bogolwane bjona e be e le bja Josefa. ₃Bana ba Rubeni morwa wa ntlha wa Isiraele, ke Hanoge, le Palu, le Hetsirone, le Karami.

₄Bana ba Joele ke Semaya; morwa wa gagwe ke Gogo morwa wa gagwe ke Simai; ₅morwa wa gagwe ke Mika; morwa wa gagwe ke Reaya; morwa wa gagwe ke Baali; ₆morwa wa gagwe ke Beera; ke yola wa go išwa bothopša ke Thigilathe-Pilesere kgoši ya Siria; gomme yena e be e le mokgoma wa ba ga Rubeni.

₇Bana babo ka mo ba bego ba balwa melokong ya bona, le ka mo ba bego ba hlatlamana matswalong, mogolo wa bona e be e le Jehiele, gwa tla Sakaria, ₈le Bela morwa wa Asasi morwa wa Sema morwa wa Joele. Yena o be a agile kua Aroere go goma ka Nebo le ka Baali-Meone. ₉O be a agile go fihla lešokeng le le thomago nokeng ya Forate, gobane mehlape ya bona e be e le e mentši nageng ya Gileada.

₁₀Mehleng ya Saulo ba kile ba lwa le Bahagari, ba ba bolaya ba dula metseng ya bona thoko yeo ya bohlabela nageng ka moka ya Gileada.

₁₁Bana ba Gada ba be ba agile ba batagane le bona nageng ya Basani go goma ka Salika. ₁₂Mokgoma wa bona e be e le Joele; wa bobedi wa bona e be e le Safama, le Jaenai, le Safate gona kua Basani. ₁₃Bana babo bona ba meloko ya bona e be e le Mikaele, le Mesulama, le Seba, le Jorai, le Jakane, le Sia, le Ebere; ke ba ba šupago. ₁₄Ke bona barwa ba Abihaili morwa wa Huri morwa wa Jaroa morwa wa Gileada morwa wa Mikaele morwa wa Jesisai morwa wa Jado morwa wa Busi. ₁₅Mokgoma wa leloko la gabo bona e be e le Ahi morwa wa Abadiele. ₁₆Ba be ba agile Gileada le Basani le metsaneng ya ntshe, le ya mabaleng ka moka a Sarona mo a fihlago ntshe. ₁₇Ka moka ba ngwadilwe mehleng ya Jothama kgoši ya Juda, le mehleng ya Jerobeama kgoši ya Isiraele.

₁₈Bana ba Rubeni le ba Gada, le ba seripa sa leloko la Manase, ge go balwa banna ba bagale, ba ba swarago kotse le lerumo, ba kgona go hlabana, e be e le ba dikete tše masome a mane a metšo e mene le makgolo a šupago a nago le masome a selelago ba ba tšwago dira. ₁₉Ba kile ba lwa le Bahagari le Jeturi le Nafisi le Nodaba, ₂₀ba ba fenya; Bahagari ba gafelwa diatleng tša bona le bao ba bego ba ema nabo; ka gobane ba le tlhabanong, ba hlabetše Modimo mokgoši, a ba kwa ka ge ba mmotile; ₂₁ba thopa dikgomo tša bona; ba thopa dikamela tše dikete tše masome a mahlano, le dihuswana tše dikete tše makgolo a mabedi a nago le masome a mahlano a dikete, le dipokolo tše dikete tše pedi, le batho ba dikete tše lekgolo ba mathopša; ₂₂gobane ntweng yeo go bolailwe ba bantši, ka ge ntwa e be e etšwa go Modimo. Gomme madulong ao a bona ba dula go fihla ge ba išwa bothopša.

₂₃Ba seripa sa leloko la Manase ba be ba agile nageng yeo go tloga Basani go fihla Baali-Heremone le Senire, le thabeng ya Heremone, e le ba bantši. ₂₄Bakgoma ba dilete tša bona šeba; Ke Efere, le Jisei, le Eliele, le Asiriele, le Jeremia, le Hodafya, le Jadiele, banna ba bagale le ba maatla, banna ba ba bego ba tumile, bakgoma ba dilete tša bona.

₂₅Fela, ba hlanogetše Modimo wa bona, ba latela medimo ya ditšhaba tšeo Modimo a di fedišitšego ge ba fihla. ₂₆Modimo a ba a hlohletša pelo ya Phule kgoši ya Asiria, le pelo ya Thigilathe-Pilesere kgoši ya Asiria, a ba iša bothopša, bona Barubeni le Bagada le seripa sa leloko la Bamanase, a ba iša Hala le Haboro nokeng ya kua Gosana; le lehono ba sa ile.