PSALMS 115

₁Nie aan ons nie, Here, nie aan ons nie,

maar aan u Naam kom die eer toe,

want dit is U wat liefde en trou bewys.

₂Waarom sou die heidene kan sê:

“Waar is hulle God nou?”

₃En dit terwyl ons God in die hemel is!

Alles wat Hy wil, doen Hy.

₄Wat húlle het, is afgode, van silwer en goud,

die werk van mensehande.

₅'n Mond het hulle, maar praat kan hulle nie,

oë het hulle, maar sien kan hulle nie;

₆ore het hulle, maar hoor kan hulle nie;

'n neus het hulle, maar ruik kan hulle nie.

₇Hulle hande, daarmee kan hulle nie voel nie,

hulle voete, daarmee kan hulle nie loop nie.

Daar kom geen geluid uit hulle keel nie.

₈Wie hulle maak en op hulle vertrou,

sal net soos hulle word.

₉Israel, vertrou op die Here!

Hy help en beskerm jou.

₁₀Huis van Aäron, vertrou op die Here!

Hy help en beskerm jou.

₁₁Julle wat die Here dien, vertrou op die Here!

Hy help en beskerm julle.

₁₂Die Here dink aan ons: Hy seën,

Hy seën die huis van Israel,

Hy seën die huis van Aäron,

₁₃Hy seën dié wat Hom dien,

klein en groot.

₁₄Mag die Here julle talryk maak,

julle én julle kinders.

₁₅Mag die Here julle seën,

Hy wat hemel en aarde gemaak het.

₁₆Die hemel is net vir die Here,

maar die aarde het Hy aan die mense gegee.

₁₇Nie die dooies prys die Here nie,

nie dié wat die graf in is nie,

₁₈maar óns, ons prys die Here, nou en vir altyd!

Prys die Here!