PSALM 95

₁KOM, laat ons jubel tot eer van die Here, laat ons juig ter ere van die rots van ons heil!

₂Laat ons sy aangesig tegemoetgaan met lof, met lofsange Hom toejuig!

₃Want die Here is 'n grote God, ja, 'n groot Koning bo al die gode.

₄In wie se hand die diepste plekke van die aarde is, en die toppe van die berge is syne.

₅Aan wie die see behoort wat Hy self gemaak het, en die droë land wat sy hande geformeer het.

₆Kom, laat ons aanbid en neerbuk; laat ons kniel voor die Here wat ons gemaak het.

₇Want Hy is onse God, en ons is die volk van sy weide en die skape van sy hand. Ag, as julle vandag maar na sy stem wou luister!

₈Verhard julle hart nie soos by Mériba, soos op die dag van Massa in die woestyn nie;

₉waar julle vaders My versoek het, My beproef het, alhoewel hulle my werk gesien het.

₁₀Veertig jaar het Ek 'n afkeer gehad van hierdie geslag en gesê: Hulle is 'n volk met 'n dwalende hart, en hulle ken my weë nie;

₁₁sodat Ek in my toorn gesweer het: Waarlik, hulle sal in my rus nie ingaan nie!