PSALM 88

₁'n LIED. 'n Psalm van die kinders van Korag. Vir die musiekleier; op die wysie van: „Máhalat leannot.” 'n Onderwysing van Heman, die Esrahiet.

₂Here, God van my heil, bedags roep ek, in die nag is dit voor U.

₃Laat my gebed voor u aangesig kom, neig u oor tot my smeking.

₄Want my siel is sat van teëspoede, en my lewe raak aan die doderyk.

₅Ek word gereken by die wat in die kuil neerdaal; ek het geword soos 'n man sonder krag,

₆vrygelaat onder die dooies, soos die wat verslaan is, wat in die graf lê, aan wie U nie meer dink nie, en wat afgesny is van u hand.

₇U het my gesit in die kuil diep daaronder, in duisternisse, in dieptes.

₈U grimmigheid rus op my, en U druk my neer met al u golwe. Sela.

₉U het my bekendes ver van my verwyder, my iets afskuweliks gemaak vir hulle; ek is ingesluit en kan nie uitkom nie.

₁₀My oog vergaan van ellende. Here, ek roep U aan die hele dag deur, ek brei my hande na U uit.

₁₁Kan U aan die dooies 'n wonder doen? Of kan skimme opstaan, kan hulle U loof? Sela.

₁₂Kan u goedertierenheid vertel word in die graf, u trou in die plek van vertering?

₁₃Kan u wondermag in die duisternis bekend word en u geregtigheid in die land van vergetelheid?

₁₄Maar ék, Here, roep U aan om hulp, en in die môre kom my gebed U tegemoet.

₁₅Here, waarom verstoot U my siel, verberg U u aangesig vir my?

₁₆Van jongs af is ek ellendig en klaar om te sterwe; ek dra u verskrikkinge, ek is radeloos.

₁₇U toorngloed het oor my gegaan; u verskrikkinge vernietig my;

₁₈die hele dag omring hulle my soos water, saam omsingel hulle my.

₁₉U het vriend en metgesel ver van my verwyder; my bekendes is duisternis.