PSALM 75

₁VIR die musiekleier; op die wysie van: „Moenie verwoes nie.” 'n Psalm van Asaf. 'n Lied.

₂Ons loof U, o God, ons loof, en naby is u Naam; hulle vertel u wonders.

₃As Ek die regte tydstip aangryp, oordeel Ék regverdig.

₄Al wankel die aarde en al sy bewoners — Ék het sy pilare vasgestel. Sela.

₅Ek sê tot die onsinniges: Wees nie onsinnig nie! en tot die goddelose: Verhef die horing nie!

₆Verhef julle horing nie daarbo en spreek nie met trots uitgerekte nek nie.

₇Want nie van die opgang of van die ondergang, ook nie van die woestyn van berghoogtes nie ...

₈maar God is regter: Hy verneder die een en verhef die ander.

₉Want in die hand van die Here is 'n beker, en die wyn skuim; dit is oorvloedig gemeng, en Hy skink daaruit; ja, die afsaksel daarvan moet al die goddelose van die aarde opslurp, uitdrink.

₁₀Maar ék sal vir ewig verkondig — ek wil psalmsing tot eer van die God van Jakob.

₁₁En ek sal al die horings van die goddelose mense stukkend breek; die horings van die regverdige sal verhef word.