PSALM 72

₁VAN Salomo.

o God, gee aan die koning u regte en u geregtigheid aan die seun van die koning.

₂Laat hy u volk oordeel met geregtigheid en u ellendiges met reg.

₃Die berge sal vrede dra vir die volk, en die heuwels, deur geregtigheid.

₄Hy sal aan die ellendiges van die volk reg verskaf, die kinders van die behoeftige verlos en die verdrukker verbrysel.

₅Hulle sal u vrees solank as die son skyn en solank as die maan daar is, van geslag tot geslag.

₆Hy sal neerdaal soos reën op die grasveld, soos buie — 'n swaar reën op die aarde.

₇In sy dae sal die regverdige bloei en volheid van vrede, totdat die maan nie meer is nie.

₈En hy sal heers van see tot see en van die Rivier tot by die eindes van die aarde.

₉Die bewoners van dor plekke sal voor hom kniel, en sy vyande sal die stof lek.

₁₀Die konings van Tarsis en van die eilande sal geskenke aanbied, die konings van Skeba en Seba belasting aanbring.

₁₁Ja, al die konings sal hulle voor hom buig, al die nasies sal hom dien.

₁₂Want hy sal die behoeftige red wat daar roep om hulp, en die ellendige en wie geen helper het nie.

₁₃Hy sal hom ontferm oor die arme en behoeftige, en die siele van die behoeftiges sal hy red.

₁₄Hy sal hulle siel verlos van verdrukking en geweld, en hulle bloed sal kosbaar wees in sy oë.

₁₅Mag hy dan lewe! en mag hulle aan hom gee van die goud van Skeba en altyddeur vir hom bid; mag hulle die hele dag hom seën!

₁₆Mag daar volheid van koring wees in die land, op die top van die berge; mag die vrug daarvan ruis soos die Líbanon; en mag hulle bloei uit die stad soos die plante van die aarde!

₁₇Mag sy naam vir ewig wees; mag sy naam uitspruit solank as die son daar is! En mag al die nasies in hom geseën word, hom gelukkig prys!

₁₈Geloofd sy die Here God, die God van Israel, wat alleen wonders doen!

₁₉En geloofd sy vir ewig sy heerlike Naam! En laat die hele aarde met sy heerlikheid vervul word! Amen, ja amen.

₂₀Hier eindig die gebede van Dawid, die seun van Ísai.