PSALM 64

₁VIR die musiekleier. 'n Psalm van Dawid.

₂Hoor my stem, o God, in my klagte; bewaar my lewe vir die skrik van die vyand.

₃Steek my weg vir die raad van die kwaaddoeners, vir die gewoel van die werkers van ongeregtigheid;

₄wat hulle tong skerp maak soos 'n swaard, hulle pyl rig — bitter woorde! —

₅om in skuilplekke na die opregte te skiet; skielik skiet hulle hom en vrees nie.

₆'n Listige plan stel hulle vir hul vas; hulle spreek af om strikke te span; hulle sê: Wie sal dit sien?

₇Hulle versin ongeregtighede: Ons is gereed! 'n Fyn uitgedinkte plan! Ja, 'n man se binneste en onpeilbare hart!

₈Maar God tref hulle met 'n pyl, skielik is hulle wonde daar.

₉En hulle tong laat hulle oor hulself struikel; almal wat hulle aansien, skud die hoof.

₁₀En alle mense vrees en verkondig die werk van God en gee ag op wat Hy doen.

₁₁Die regverdige sal bly wees in die Here en by Hom skuil, en al die opregtes van hart sal hulle beroem.