PSALM 50

₁'n PSALM van Asaf.

Die God van die gode, die Here, spreek en roep die aarde, van die opgang van die son af tot sy ondergang toe.

₂Uit Sion, die volkomenheid van skoonheid, verskyn God in ligglans.

₃Onse God kom en kan nie swyg nie. Vuur verteer voor sy aangesig, en rondom Hom storm dit geweldig.

₄Hy roep na die hemel daarbo, en na die aarde, om sy volk te oordeel:

₅Versamel my gunsgenote vir My, hulle wat my verbond by die offer sluit!

₆En — die hemele verkondig sy geregtigheid, want God staan gereed om te oordeel! Sela.

₇Hoor, my volk, dat Ek kan spreek; Israel, dat Ek jou dit kan inskerp: Ek is God, jou God!

₈Oor jou offers bestraf Ek jou nie, en jou brandoffers is altyddeur voor My.

₉Ek hoef uit jou huis geen stier te neem of bokke uit jou krale nie;

₁₀want al die wilde diere van die bos is myne, die vee op berge by duisende.

₁₁Ek ken al die voëls van die berge, en wat roer op die veld, is van My.

₁₂As Ek honger het, sal Ek jou dit nie sê nie; want die wêreld is myne en sy volheid.

₁₃Sou Ek vleis van stiere eet of bloed van bokke drink?

₁₄Offer dank aan God, en betaal jou geloftes aan die Allerhoogste;

₁₅en roep My aan in die dag van benoudheid: Ek sal jou uithelp, en jy moet My eer.

₁₆Maar aan die goddelose sê God: Wat vertel jy nog my insettinge en neem jy my verbond in jou mond —

₁₇terwyl jy die tug haat en my woorde agter jou werp?

₁₈As jy 'n dief sien, dan geval dit jou by hom, en jou deel is met die egbrekers.

₁₉Jou mond laat jy los in boosheid, en jou tong vleg bedrog.

₂₀Jy sit en praat teen jou broer, die seun van jou moeder beskimp jy.

₂₁Hierdie dinge het jy gedoen, en sou Ek swyg? Jy dink Ek is net soos jy! Ek gaan jou straf en jou dit ordelik voor oë stel.

₂₂Verstaan dit tog, o Godvergeters, sodat Ek nie verskeur sonder dat iemand red nie.

₂₃Die een wat dank offer, eer My; en die een wat op sy weg ag gee, hom sal Ek die heil van God laat geniet.