PSALM 48

₁'n LIED. 'n Psalm van die kinders van Korag.

₂Die Here is groot en baie lofwaardig in die stad van onse God, sy heilige berg!

₃Skoon deur sy verhewenheid, die vreugde van die hele aarde is die berg Sion, aan die noordekant, die stad van die groot Koning!

₄God het Hom in sy paleise bekend gemaak as 'n rotsvesting.

₅Want kyk, die konings het bymekaargekom, tesame opgetrek.

₆Skaars het hulle dit gesien, of hulle het verstom, verskrik geword, in angs weggevlug.

₇Bewing het hulle daar aangegryp, smart soos van een wat baar.

₈Deur die oostewind verbreek U die skepe van Tarsis.

₉Soos ons gehoor het, so het ons gesien in die stad van die Here van die leërskare, in die stad van onse God: God sal dit bevestig tot in ewigheid. Sela.

₁₀o God, ons dink aan u goedertierenheid binne-in u tempel.

₁₁Soos u Naam, o God, so is u roem tot die eindes van die aarde toe; u regterhand is vol geregtigheid.

₁₂Laat die berg Sion bly wees, laat die dogters van Juda juig oor u oordele.

₁₃Gaan rondom Sion, trek daaromheen, tel sy torings;

₁₄let op sy skanse, wandel deur sy paleise, sodat julle dit aan die volgende geslag kan vertel,

₁₅dat hierdie God onse God is, vir ewig en altyd; Hý sal ons lei tot die dood toe.