PSALM 4

₁VIR die musiekleier; met snaarinstrumente. 'n Psalm van Dawid.

₂As ek roep, verhoor my, o God van my geregtigheid! In benoudheid het U vir my ruimte gemaak; wees my genadig, en hoor my gebed!

₃o Manne, hoe lank sal my eer tot skande wees? Hoe lank sal julle die nietigheid liefhê, die leuen soek? Sela.

₄Weet tog dat die Here vir Hom 'n gunsgenoot afgesonder het; die Here hoor as ek Hom aanroep.

₅Sidder, en moenie sondig nie; spreek in julle hart op julle bed, en wees stil. Sela.

₆Offer offerandes van geregtigheid en vertrou op die Here.

₇Baie sê: Wie sal ons die goeie laat sien? Verhef oor ons die lig van u aangesig, o Here!

₈Groter vreugde het U in my hart gegee as wanneer hulle koring en hulle mos oorvloedig is.

₉Ek wil in vrede gaan lê en meteens aan die slaap raak; want U, o Here, alleen laat my in veiligheid woon.