PSALM 38

₁'n PSALM van Dawid, by die gedenkoffer.

₂o Here, straf my nie in u toorn nie en kasty my nie in u grimmigheid nie.

₃Want u pyle het in my ingedring, en u hand het op my neergedaal.

₄Daar is geen heel plek in my vlees vanweë u grimmigheid nie; daar is niks gesond in my gebeente vanweë my sonde nie.

₅Want my ongeregtighede gaan oor my hoof; soos 'n swaar pak het hulle vir my te swaar geword.

₆My wonde stink, hulle dra vanweë my dwaasheid.

₇Ek is krom, heeltemal geboë; die hele dag gaan ek in die rou;

₈want my lendene is vol ontsteking, en daar is geen heel plek in my vlees nie.

₉Ek is kragteloos en heeltemal verbrysel; ek brul van die gebons van my hart.

₁₀Here, voor U is al my begeertes, en my gesug is vir U nie verborge nie.

₁₁My hart slaan vinnig, my krag het my verlaat; en die lig van my oë, ook dit is nie by my nie.

₁₂Die wat my liefhet en my vriende is, staan opsy vir my kwaal, en my nabestaandes het ver gaan staan;

₁₃en die wat my lewe soek, span strikke; en die wat my ongeluk soek, spreek van ondergang, en hulle bedink die hele dag bedrog.

₁₄Maar ek is soos 'n dowe: ek hoor nie, en soos 'n stomme wat sy mond nie oopmaak nie.

₁₅Ja, ek is soos 'n man wat nie hoor nie en in wie se mond geen teëspraak is nie;

₁₆want op U, Here, wag ek; Ú sal verhoor, Here my God!

₁₇Want ek het gesê: Laat hulle net nie bly wees oor my nie! Hulle wat by die wankeling van my voet hul groot maak teen my!

₁₈Want ek is klaar om te val, en my smart is altyddeur voor my.

₁₉Ja, my ongeregtigheid bely ek, ek is bekommerd oor my sonde.

₂₀Maar my vyande lewe, hulle is magtig; en die wat my valslik haat, is groot in aantal.

₂₁En die wat kwaad vir goed vergeld, behandel my vyandig, omdat ek die goeie najaag.

₂₂Verlaat my nie, o Here! My God, wees nie ver van my af nie!

₂₃Maak tog gou om my te help, Here, my heil!