PSALM 37

₁ 'n PSALM van Dawid.

Alef. Wees nie toornig op die kwaaddoeners nie, beny hulle nie wat onreg doen nie;

₂want soos gras sal hulle gou verwelk, en soos groen grasspruitjies sal hulle verdroog.

₃Bet. Vertrou op die Here, en doen wat goed is; bewoon die aarde en beoefen getrouheid,

₄en verlustig jou in die Here; dan sal Hy jou gee die begeertes van jou hart.

₅Gimel. Laat jou weg aan die Here oor en vertrou op Hom, en Hý sal dit uitvoer;

₆en Hy sal jou geregtigheid laat voortkom soos die lig en jou reg soos die middag.

₇Dalet. Swyg voor die Here en verwag Hom; wees nie toornig op hom wat voorspoedig in sy weg is nie, op die man wat listige planne uitvoer nie.

₈He. Laat staan die toorn en verlaat die grimmigheid; wees nie toornig nie: dit is net om kwaad te stig.

₉Want die kwaaddoeners sal uitgeroei word; maar die wat die Here verwag, hulle sal die aarde besit.

₁₀Wau. En nog 'n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie.

₁₁Die ootmoediges daarenteen sal die aarde besit en hulle verlustig oor groot vrede.

₁₂Sajin. Die goddelose bedink listige planne teen die regverdige en kners met sy tande teen hom.

₁₃Die Here lag oor hom, want Hy sien dat sy dag kom.

₁₄Get. Die goddelose het die swaard getrek en hulle boog gespan om die ellendige en behoeftige te laat val, om dié te slag wat opreg is van weg.

₁₅Hulle swaard sal in hul hart gaan, en hulle boë sal verbreek word.

₁₆Tet. 'n Klein bietjie is vir die regverdige beter as die rykdom van baie goddelose;

₁₇want die arms van die goddelose sal verbreek word, maar die Here ondersteun die regverdiges.

₁₈Jod. Die Here ken die dae van die opregtes, en hulle erfdeel sal tot in ewigheid bly.

₁₉Hulle sal nie beskaamd staan in die slegte tyd nie, en in dae van hongersnood sal hulle versadig word.

₂₀Kaf. Maar die goddelose sal omkom en die vyande van die Here soos die prag van die weivelde; hulle verdwyn soos rook, hulle verdwyn.

₂₁Lamed. Die goddelose leen en gee nie terug nie, maar die regverdige ontferm hom en gee;

₂₂want die wat deur Hom geseën word, sal die aarde besit; maar die wat deur Hom vervloek word, sal uitgeroei word.

₂₃Mem. Deur die Here word die gange van 'n man bevestig, en Hy het 'n welbehae in sy weg.

₂₄As hy val, dan stort hy nie neer nie; want die Here ondersteun sy hand.

₂₅Noen. Ek was jonk, ook het ek oud geword, maar nooit het ek die regverdige verlate gesien, of dat sy nageslag brood soek nie.

₂₆Die hele dag ontferm hy hom en leen uit, en sy nageslag is 'n seën.

₂₇Samek. Wyk af van wat kwaad is, en doen wat goed is, en jy sal vir ewig woon;

₂₈want die Here het die reg lief en sal sy gunsgenote nie verlaat nie; vir ewig word hulle bewaar, maar die nageslag van die goddelose word uitgeroei.

₂₉Die regverdiges sal die aarde besit en vir ewig daarop woon.

₃₀Pe. Die mond van die regverdige verkondig wysheid, en sy tong spreek wat reg is.

₃₁Die wet van sy God is in sy hart; sy gange sal nie wankel nie.

₃₂Sade. Die goddelose loer op die regverdige en soek om hom dood te maak.

₃₃Die Here gee hom nie oor in sy hand nie, en Hy veroordeel hom nie as hy gerig word nie.

₃₄Kof. Wag op die Here en hou sy weg, en Hy sal jou verhoog, om die aarde te besit; jy sal met welgevalle neersien op die uitroeiing van die goddelose mense.

₃₅Resj. Ek het die goddelose gesien, 'n geweldenaar, terwyl hy hom uitbrei soos 'n groen inlandse boom.

₃₆Toe gaan iemand verby, en kyk, hy was daar nie; en ek het hom gesoek, maar hy was nie te vinde nie.

₃₇Sjin. Let op die vrome en kyk na die opregte, want daar is 'n toekoms vir die man van vrede.

₃₈Maar die oortreders word tesame verdelg; die toekoms van die goddelose word afgesny.

₃₉Tau. Maar die hulp van die regverdiges is van die Here, hulle toevlug in tyd van benoudheid.

₄₀En die Here help hulle en red hulle; Hy red hulle van die goddelose mense en verlos hulle, want hulle skuil by Hom.