PSALM 33

₁o REGVERDIGES, jubel in die Here! 'n Loflied betaam die opregtes.

₂Loof die Here met die siter; psalmsing tot sy eer met die tiensnarige harp.

₃Sing tot sy eer 'n nuwe lied; speel goed met trompetgeklank.

₄Want die woord van die Here is reg, en al sy werk is met trou.

₅Hy het geregtigheid en reg lief; die aarde is vol van die goedertierenheid van die Here.

₆Deur die Woord van die Here is die hemele gemaak en deur die Gees van sy mond hulle hele leër.

₇Hy versamel die waters van die see soos 'n hoop; Hy bêre die wêreldvloede weg in skatkamers.

₈Laat die hele aarde vir die Here vrees; laat al die bewoners van die wêreld vir Hom bedug wees;

₉want Hý het gespreek, en dit was; Hý het gebied, en dit staan.

₁₀Die Here vernietig die raad van die nasies, Hy verydel die gedagtes van die volke.

₁₁Die raad van die Here bestaan vir ewig, die gedagtes van sy hart van geslag tot geslag.

₁₂Welgeluksalig is die nasie wie se God die Here is, die volk wat Hy vir Hom as erfdeel uitgekies het.

₁₃Die Here kyk van die hemel af; Hy sien al die mensekinders.

₁₄Uit sy woonplek aanskou Hy al die bewoners van die aarde,

₁₅Hy wat die hart van hulle almal formeer, wat let op al hul werke.

₁₆'n Koning word nie verlos deur 'n groot leër, 'n held nie gered deur groot krag nie.

₁₇Die perd help niks vir die oorwinning en red nie deur sy groot krag nie.

₁₈Kyk, die oog van die Here is op die wat Hom vrees, op die wat op sy goedertierenheid wag;

₁₉om hulle siel te red van die dood en hulle in die lewe te hou in hongersnood.

₂₀Ons siel wag op die Here; Hy is ons hulp en ons skild;

₂₁want ons hart is bly in Hom, omdat ons op sy heilige Naam vertrou.

₂₂Laat u goedertierenheid, Here, oor ons wees net soos ons op U wag!