PSALM 3

₁'n PSALM van Dawid toe hy gevlug het vir sy seun Absalom.

₂o Here, hoe het my teëstanders vermenigvuldig! Baie staan teen my op.

₃Baie sê van my: Daar is geen heil vir hom by God nie. Sela.

₄Maar U, Here, is 'n skild wat my beskut, my eer en die Een wat my hoof ophef.

₅Luid roep ek die Here aan, en Hy verhoor my van sy heilige berg. Sela.

₆Ek het gaan lê en aan die slaap mag raak; ek het wakker geword, want die Here ondersteun my.

₇Ek sal nie vrees vir tienduisende van mense wat rondom teen my gereed staan nie.

₈Staan op, Here; verlos my, my God! Want U het al my vyande op die kakebeen geslaan; U het die tande van die goddelose stukkend gebreek.

₉Die heil behoort aan die Here; laat u seën wees oor u volk! Sela.