PSALM 24

₁'n PSALM van Dawid.

Die aarde behoort aan die Here en die volheid daarvan, die wêreld en die wat daarin woon;

₂want Hý het dit gegrond op die seë en dit vasgestel op die strome.

₃Wie mag klim op die berg van die Here? En wie mag staan in sy heilige plek?

₄Hy wat rein van hande en suiwer van hart is, wat sy siel nie ophef tot nietigheid en nie vals sweer nie.

₅Hy sal seën wegdra van die Here en geregtigheid van die God van sy heil.

₆Dit is die geslag van hulle wat na Hom vra, wat u aangesig soek — dit is Jakob. Sela.

₇Hef op julle hoofde, o poorte, ja, verhef julle, ewige deure, dat die Erekoning kan ingaan!

₈Wie is tog die Erekoning? Die Here, sterk en geweldig, die Here geweldig in die stryd.

₉Hef op julle hoofde, o poorte, ja, hef op, ewige deure, dat die Erekoning kan ingaan!

₁₀Wie is dan tog die Erekoning? Die Here van die leërskare — Hy is die Erekoning! Sela.