PSALM 21

₁VIR die musiekleier. 'n Psalm van Dawid.

₂o Here, die koning is bly oor u sterkte, en hoe baie juig hy oor u hulp!

₃U het hom die wens van sy hart gegee en die begeerte van sy lippe nie geweier nie. Sela.

₄Want U kom hom tegemoet met seëninge van die goeie; op sy hoof sit U 'n kroon van fyn goud.

₅Die lewe het hy van U begeer; U het hom dit gegee: lengte van dae, vir ewig en altyd.

₆Groot is sy eer deur u hulp; majesteit en heerlikheid het U op hom gelê.

₇Want U maak hom baie geseënd vir ewig; U maak hom bly met vreugde by u aangesig.

₈Want die koning vertrou op die Here, en deur die goedertierenheid van die Allerhoogste sal hy nie wankel nie.

₉U hand sal al u vyande vind; u regterhand sal u haters vind.

₁₀U sal hulle maak soos 'n vurige oond as U verskyn; die Here sal hulle verslind in sy toorn, en vuur sal hulle verteer.

₁₁U sal hulle vrug van die aarde af verdelg en hulle nageslag van die mensekinders af weg.

₁₂Want hulle het U met onheil bedreig; hulle het 'n listige plan uitgedink sonder om iets uit te rig.

₁₃Want U sal hulle dwing om te vlug; met u boogsnare sal u mik op hulle gesig.

₁₄Verhef U, Here, in u sterkte; ons wil u heldekrag eer met psalmgesang!