PSALM 19

₁VIR die musiekleier. 'n Psalm van Dawid.

₂Die hemele vertel die eer van God, en die uitspansel verkondig die werk van sy hande.

₃Die een dag stort vir die ander 'n boodskap uit, en die een nag kondig vir die ander kennis aan:

₄daar is geen spraak en daar is geen woorde nie — onhoorbaar is hulle stem.

₅Hulle meetsnoer gaan uit oor die hele aarde, en hulle woorde tot by die einde van die wêreld. Vir die son het Hy daarin 'n tent gemaak;

₆en dié is soos 'n bruidegom wat uitgaan uit sy slaapkamer; hy is bly soos 'n held om die pad te loop.

₇Sy uitgang is van die einde van die hemel af, en sy omloop tot by die eindes daarvan, en niks is verborge vir sy hitte nie.

₈Die wet van die Here is volmaak: dit verkwik die siel; die getuienis van die Here is gewis: dit gee wysheid aan die eenvoudige.

₉Die bevele van die Here is reg: hulle verbly die hart; die gebod van die Here is suiwer: dit verlig die oë.

₁₀Die vrees van die Here is rein: dit bestaan tot in ewigheid; die verordeninge van die Here is waarheid — tesame is hulle regverdig.

₁₁Hulle is begeerliker as goud, ja, as baie fyn goud; en soeter as heuning en heuningstroop.

₁₂Ook word u kneg daardeur gewaarsku; in die onderhouding daarvan is groot loon.

₁₃Die afdwalinge — wie bemerk hulle? Spreek my vry van die wat verborge is.

₁₄Hou u kneg ook terug van moedswillige sondes; laat dit nie oor my heers nie. Dan sal ek onbestraflik wees en vry van groot oortreding.

₁₅Laat die woorde van my mond en die oordenking van my hart welbehaaglik wees voor u aangesig, o Here, my rots en my verlosser!