PSALM 135

₁HALLELUJA! Prys die Naam van die Here! Prys, o knegte van die Here,

₂wat staan in die huis van die Here, in die voorhowe van die huis van onse God!

₃Loof die Here, want die Here is goed; psalmsing tot eer van sy Naam, want dié is lieflik!

₄Want die Here het Jakob vir Hom uitverkies, Israel as sy eiendom.

₅Waarlik, ék weet dat die Here groot en onse Here bo alle gode is.

₆Alles wat die Here behaag, doen Hy, in die hemel en op die aarde, in die seë en al die dieptes.

₇Hy wat die dampe laat opgaan van die einde van die aarde af, bliksemstrale by die reën maak, die wind uit sy skatkamers laat uitgaan;

₈wat die eersgeborenes van Egipte getref het, van mense sowel as van vee;

₉wat tekens en wonders gestuur het binne-in jou, o Egipte, teen Farao en teen al sy knegte;

₁₀wat baie nasies verslaan het en magtige konings gedood het:

₁₁Sihon, die koning van die Amoriete, en Og, die koning van Basan, en al die koninkryke van Kanaän,

₁₂en hulle land as erfdeel gegee het, as erfdeel aan Israel, sy volk.

₁₃o Here, u Naam is tot in ewigheid, u gedenknaam, Here, van geslag tot geslag!

₁₄Want die Here sal aan sy volk reg doen en medelyde hê met sy knegte.

₁₅Die afgode van die heidene is silwer en goud, 'n werk van mensehande.

₁₆Hulle het 'n mond, maar praat nie; hulle het oë, maar sien nie;

₁₇ore het hulle, maar hoor nie; ook is daar geen asem in hulle mond nie.

₁₈Die wat hulle maak, sal net soos hulle word — elkeen wat op hulle vertrou.

₁₉Huis van Israel, loof die Here! Huis van Aäron, loof die Here!

₂₀Huis van Levi, loof die Here! Julle wat die Here vrees, loof die Here!

₂₁Geloofd sy die Here uit Sion, Hy wat in Jerusalem woon! Halleluja!