PSALM 124

₁'n BEDEVAARTSLIED. Van Dawid.

As die Here nie vir ons was nie — laat Israel dit sê —

₂as die Here nie vir ons was toe die mense teen ons opgestaan het nie,

₃dan het hulle ons lewendig verslind toe hulle toorn teen ons ontvlam het;

₄dan het die waters ons oorstroom, 'n stroom het oor ons siel gegaan;

₅dan het die trotse waters oor ons siel gegaan.

₆Geloofd sy die Here wat ons aan hulle tande nie as buit oorgegee het nie!

₇Ons siel het vrygeraak soos 'n voël uit die vangnet van die voëlvangers; die vangnet is gebreek, en ons, ons het vrygeraak.

₈Ons hulp is in die Naam van die Here wat hemel en aarde gemaak het.