PSALM 116

₁EK het lief, want die Here hoor my stem, my smekinge,

₂want Hy het sy oor tot my geneig; daarom sal ek Hom in my dae aanroep.

₃Bande van die dood het my omring, en angste van die doderyk het my getref; ek het benoudheid en kommer gevind.

₄Maar ek het die Naam van die Here aangeroep: Ag, Here, red my siel.

₅Die Here is genadig en regverdig, en onse God is 'n ontfermer.

₆Die Here bewaar die eenvoudiges; ek het swak geword, maar Hy het my gehelp.

₇My siel, keer terug tot jou rus; want die Here het goed aan jou gedoen.

₈Want U het my siel gered van die dood, my oog van trane, my voet van struikeling.

₉Ek sal wandel voor die aangesig van die Here in die lande van die lewendes.

₁₀Ek het geglo toe ek gespreek het: Ék is diep neergebuig.

₁₁Ék het in my angs gesê: Alle mense is leuenaars.

₁₂Wat sal ek die Here vergeld vir al sy weldade aan my?

₁₃Ek sal die beker van verlossinge opneem en die Naam van die Here aanroep.

₁₄My geloftes sal ek aan die Here betaal in die teenwoordigheid van sy ganse volk.

₁₅Kosbaar is in die oë van die Here die dood van sy gunsgenote.

₁₆Ag, Here, sekerlik, ek is u kneg, ek is u kneg, die seun van u diensmaagd; U het my bande losgemaak.

₁₇Ek sal U 'n offer van danksegging bring en die Naam van die Here aanroep.

₁₈Ek sal my geloftes aan die Here betaal in die teenwoordigheid van sy ganse volk,

₁₉in die voorhowe van die huis van die Here, binne-in jou, o Jerusalem! Halleluja!