PSALM 114

₁TOE Israel uit Egipte getrek het, die huis van Jakob uit 'n volk met 'n vreemde taal,

₂het Juda sy heiligdom geword, Israel sy ryksgebied.

₃Die see het dit gesien en gevlug; die Jordaan het agteruitgewyk.

₄Die berge het rondgespring soos ramme, die heuwels soos lammers.

₅Wat is dit met jou, o see, dat jy vlug? o Jordaan, dat jy agteruitwyk?

₆o Berge, dat julle rondspring soos ramme? o Heuwels, soos lammers?

₇Beef, aarde, voor die aangesig van die Here, voor die aangesig van die God van Jakob,

₈wat die rots verander het in 'n waterplas, die keisteen in 'n waterfontein!