PSALM 11

₁VIR die musiekleier. 'n Psalm van Dawid.

By die Here skuil ek. Hoe kan julle dan vir my sê: Vlug na julle berg soos 'n voël!

₂Want kyk, die goddelose span die boog; hulle het hul pyl op die snaar reggesit om in die donker te skiet na die opregtes van hart.

₃As die fondamente omgegooi word, wat kan die regverdige doen?

₄Die Here is in sy heilige paleis; die troon van die Here is in die hemel; sy oë sien, sy ooglede toets die mensekinders.

₅Die Here toets die regverdige; maar sy siel haat die goddelose en die wat geweld liefhet.

₆Hy sal op die goddelose vangnette, vuur en swawel laat reën; en 'n gloeiende wind sal die deel van hulle beker wees.

₇Want die Here is regverdig; Hy het geregtighede lief; die opregtes sal sy aangesig sien.