PSALM 1

₁WELGELUKSALIG is die man wat nie wandel in die raad van die goddelose en nie staan op die weg van die sondaars en nie sit in die kring van die spotters nie;

₂maar sy behae is in die wet van die Here, en hy oordink sy wet dag en nag.

₃En hy sal wees soos 'n boom wat geplant is by waterstrome, wat sy vrugte gee op sy tyd en waarvan die blare nie verwelk nie; en alles wat hy doen, voer hy voorspoedig uit.

₄So is die goddelose mense nie, maar soos kaf wat die wind verstrooi.

₅Daarom sal die goddelose nie bestaan in die oordeel en die sondaars in die vergadering van die regverdiges nie.

₆Want die Here ken die weg van die regverdiges, maar die weg van die goddelose sal vergaan.